د خوست چارواکي وایي، د شېخ زاید پوهنتون په کادري روغتون کې یې د اکسیجن د تولید دستګا فعاله کړه.
د خوست د عامې روغتیا مشر حبیب شا انصاري وایي، دا دستګا به چې پرون جمعه(د غبرګولي ۲۸مه) پرانیستل شوه، هره ورځ شل بالونه اکسیجن تولید کړای شي.
انصاري ازادي راډیو ته وویل: "دا په ورځ کې د شلو بالونو په اندازه د اکسیجن د تولید ظرفیت لري، په خوست کې اړتیا ډېره ده، خو موږ سره په عاجلو واقعاتو کې لومړنۍ مرسته کولای شي، موږ هره ورځ تقریباً د اکسیجن ۱۲۰ بالونو ته ضرورت لرو."
په افغانستان کې د کرونا د پیښو له زیاتوالي سره روغتونونه د اکسیجن له کمښت سره مخ شوي دي.
تېره اوونۍ د عامې روغتیا وزارت وویل، د اکسیجن لپاره د دوی ورځنۍ اړتیا له لس زره ډبو پورته ده، حال دا چې ټول افغانستان کې خصوصي سکټور یوازې د اړتیا نیمایي برخه تولیدولی شي.
په افغانستان کې پرون د کرونا د مثبتو پېښو شمېر له یو لک او پنځو زرو واوښت او له دې کبله د څه باندې څلور زره کسانو د مړینې شمير ثبت شوی دی.
اندېښنې بیا دا دي چې نارسمي شمېرې له دې ډېرې زیاتې دي.