د مسکو ښاروال په دغه ښار کې د کووېډ-۱۹ ناروغۍ د زیاتېدو له کبله خبرداری ورکړی دی.
د خطر دا زنګ داسې مهال وهل کیږي چې د روسیې په پلازمېنه او یو شمېر نورو ښارونو کې د کرونا زیات شمېر نوې پیښې ثبت شوي دي.
تازه په یوه شپه او ورځ کې د روسیې دننه د کرونا ۱۲۵۰۰ پېښې ثبت شوې چې دا د تېرې فبروري میاشتې له وروستیو راهیسې تر ټولو لوړې شمېرې دي.
دغه هېواد کې د کرونا د پېښو مجموعي شمېر څه باندې پنځه میلیونه او ۱۸۰ زرو ته رسیدلی دی.
د نوېو پېښو ډېر شمېر یعنې څه باندې ۵۸۰۰ یوازې مسکو کې ثبت شوي چې ښاروال سرګي سوبیانین یې اندېښمن کړی دی.
هغه ویلي، د کرونایي ناروغانو درملنه ورځ تر بلې سختېږي.