د افغانستان د عامې روغتیا وزارت په تېرو ۲۴ ساعتونو کې د کرونا د مثبتو پېښو او له امله یې د مړینو د زیاتوالي خبر ورکوي.
د دې وزارت مرستیال ویاند میرویس علیزي تېره شپه ازادي راډیو ته وویل چې په دې موده کې ۱۲۷۳ کسان پر کرونا اخته شوي چې په دې سره پر کرونا د ټولو اخته شوېو کسانو رسمي شمېر ۷۹۲۳۶ ته ورسېد.
نوموړي د مړینو په اړه وویل: "په خواشینی سره په دې موده کې ۴۱ کسانو د کرونا له امله خپل ژوند له لاسه ورکړی چې دا ډېر غټ رقم دی په تېرو ۲۴ ساعتونو کې چې په دې سره زموږ د ټولو مړینو رسمي شمېر ۳۱۴۵ ته ورسېد."
د افغانستان د عامې روغتیا وزارت دغه راز له خلکو غواړي چې د کرونا د درېیمې څپې د مخنیوي لپاره دې روغتیایي سپارښتنې په پام کې ونیسي که نه د دې خطرشته چې وضعیت له کنټروله ووځي.