د امریکا دفاع وزیر لوېډ اسټن د مرکزي قوماندانۍ مشر فرانک مککنزي مؤظف کړی چې له افغانستانه د دوی د ملکي همکارانو د ایستلو لارې چارې معلومې کړي.
د 'ډیفینس ون' خپرونې د راپور له مخې مککنزي ته دنده ورکړل شوې چې له افغانستانه د امریکایي ځواکونو ژباړونکي او نور هغه ملکیان وباسي چې دې ځواکونو سره یې کار کړی دی.
دا هغه ژباړونکي او کار کوونکي ښودل شوي چې د بهرنیو ځواکونو له وتلو وروسته یې ژوند د طالبانو له خوا له خطر سره مخامخېدای شي.
د راپور په دوام کې راغلي، اوس به د سپینې ماڼۍ د پرېکړې له مخې د دغو افغانانو لېږدولو ته لارې چارې سنجول کېږي.
دا په داسې حال کې ده چې له دې وړاندې ځینو ژباړونکو ویلي و چې د امریکا له خوا یې د ویزې غوښتنلیکونه رد شوي دي، خو د تېرې سې شنبې په ورځ د امریکا د دفاع وزارت ویاند جان کربي وویل، د افغان ژباړونکو او امریکایي ځواکونو له همکارانو سره د واشنګټن ژمنه پرخپل ځای ده.
