د هرې ورځې په تیرېدو سره د سید الشهدا ښوونځي د برید د قربانیانو شمېر زیاتیږي.
د افغانستان د جمهور رییس د دویم مرستیال دفتر وايي، د کابل په لوېدیځ کې د سیدالشهدا په ښوونځي برید کې د وژل شویو کسانو شمېر له ۱۰۰او د ټپیانو شمېر له ۱۶۰ پورته شوی دی.
د ورانې لمریزې میاشتې په اتلسمه نېټه تردغه بريد وروسته د افغانستان جمهور رییس محمد اشرف غني ښاغلي دانش ته د ورته بریدونو د مخنیوي لپاره د یوې طرحې د جوړېدو لارښوونه وکړه.
د ښاغلي دانش د دفتر رییس محمد هدایت نن شنبه (د غبرګولي ۱مه) ازادي راډيو ته وویل چې دغه طرحه جوړه شوې او د امنیت شورا په واک کې ده.
هدایت زیاته کړه: "طرحه د افغانستان د جمهور رییس د دویم معاونیت له خوا جوړه شوې او جمهور ریاست او امنیت شورا ته استول شوې ده، هیله لرو چې ژر تر ژره د دې طرحې د عملي کېدو لپاره پرېکړه وشي."
ښاغلی هدایت د دې طرحې په اړه جزییات ورنه کړل، خو ویې ويل چې دا طرحه د سيمې له سپین ږیرو او مشرانو سره په مشوره جوړه شوې ده.
د کابل به لوېدېځ کې په سیدالشهدا ښوونځي تر برید مخکې په ياده سیمه کې يو شمېر فرهنګي، ورزشي او روغتیايي مرکزونه هم په نښه شوي دي.
دغو بریدونو د سیمې د اوسیدونکو جدي اندېښنې راپورته کړي او جمهور رییس هم د خلکو اندېښنو ته په ځواب کې خپل دویم مرستیال ته د یوې امنیتي طرحې د جوړېدو لارښوونه وکړه.
بل خوا هغه مرستندويه بنسټ چې د سیدالشهدا پېښې قربانیان یې خارو ته وسپارل، د قربانیانو له کورنیو سره د مرستې خبره کوي.
د دې بنسټ غړی شریف الله وطندوست وايي، تر دا مهاله دوی۷ میلیونه افغانۍ راټولې کړي دي: "څه نا څه مرستې موږ ته را رسیدلي دي چې ۷ میلیونه افغانۍ کېږي، موږ د هر شهید شوي کورنۍ ته ۳۰زره افغانۍ او د ټپي شوې کورنۍ ته ۱۵ زره افغانۍ مرسته ورکوو، پاتې پیسې د ټپیانو د درملنې لپاره چې ټپونه یې ژور دي او په روغتونونو کې دي، مرسته کوو."
د دغه بنسټ د موندنو له مخې بيا په دې برید کې ۸۴ کسان وژل شوي او ۱۹۵ نور ټپیان دي.
له دې وړاندې افغان حکومت هم د قربانیانو له کورنیو سره مرستې کړې وې.