د افغانستان د بیارغونې لپاره د امریکا متحده ایالاتو سرمفتش 'سیګار' ویلي چې طالبانو په پرله پسې ډول د افغانستان په بېلابېلو برخو کې پر روغتیایي مرکزونو او کار کوونکو بریدونو ته دوام ورکړی دی.
سیګار د مې په ۱۹مه نېټه پر ټویټر ولیکل چې طالبان روغتیایي کارکوونکي تښتوي او هغوی په زوره د خپلو وسله والو لپاره روغتیایي خدماتو او درملو برابرولو ته اړ باسي او یا هم طالبانو ته باید پیسې ورکړي.
دغه دفتر د یوناما هغه اټکل ته اشاره کړې چې وایي، د امنیتي ملحوظاتو له امله د روغتیایي مرکزونو د تړل کېدل تر درې میلیونه پورې افغانان له اړینو روغتیایي خدمتونو بې برخې کړي دي.
وسله والو طالبانو تردې دمه د سیګار دې ادعا ته غبرګون نه دی ښودلی.
سیګار وایي، د امریکا متحده ایالاتو تر اوسه د افغانستان د روغتیا له سکتور سره ۱،۶ میلیارده ډالره مرسته کړې ده.
تر دې وړاندې د سره صلیب نړیوالې کمېټې پر روغتیایي کارکوونکو د قصدي بریدونو د ډیرېدو له کبله اندېښنه ښودلې او ویلي یې و چې په دې هېواد کې د تاوتریخوالي دوام به میلیونونه افغانان له روغتیایي خدمتونو محروم کړي.
