د ایران روغتیایي چارواکي په یوه ورځ کې د کرونا له امله د زیات شمېر کسانو له مړه کېدو سره سم خبرداری ورکوي چې د کووېډ -۱۹ له امله د مړینو شمېر به راتلونکو اونیو کې ډېر لوړ شي.
د دې هېواد د روغتیا وزارت د شمېرو له مخې تېرو ۲۴ ساعتونو کې ۴۹۶ کسان د دغه ویروس له امله مړه شوي چې دا په وروستیو ورځو کې د مړینو لوړ شمېر دی.
په دې سره په ایران کې د کرونا له امله د ټولو مړو شوېو کسانو شمېر له اویا زرو واوښت. ایران دغه راز په دې موده کې پر کرونا له ۲۱ زره زیاتو کسانو د اخته کېدو خبر هم ورکړی چې په دې سره دغه ویروس د اخته شوېو کسانو شمېر له دوه میلیونه او څلور لکه کسانو واوښت.
د ایران ایرنا دولتي خبري اژانس د دې هېواد د روغتیا د مرستیال وزیر ایرج حریرچي له قوله خبر ورکړی چې ویلي یې دي راتلونکو دوو اونیو کې به د مړینو شمېر زیات شي.
ایراني چارواکي وایي، د ویروس هغې بڼې چې هند یې ډېر ځپلی، دې هېواد کې هم سرایت کړی دی.
په ایران کې د کرونا ضد واکسین لړۍ د فبروري میاشتې په لومړیو کې پیل شوې او تر اوسه یوازې اته لکه او ۲۴ زره ډوزه تطبیق شوی دی.