د امریکا دفاع وزارت غواړي چې له افغانستانه د امریکایي ځواکونو د ایستلو د بهیر پر مهال یو شمېر الوتکې په منځني ختیځ کې وساتي.
د دفاع وزارت ویاند جان کربي پرون په واشنګټن کې خبریالانو ته وویل: "موږ غواړو چې په خوندي، منظم، عمدي او مسؤل ډول ووځو، زموږ د ځواکونو خوندیتوب لومړیتوب لري."
اسوشیټېډ پرېس اژانس پرون جمعه (د غويي ۳مه) د قطر په العُدید هوایي ډګر کې د دوو-بي دوه پنځوس الوتکو د کښیناستو تصویرونه خپاره کړل.
جان کربي وویل چې دا الوتکې سیمې ته د وار له مخه احتیاطي تدابیرو لپاره رسیدلي دي.
ټاکل شوې ده چې له راتلونکې شنبې ورو-ورو له افغانستانه څه باندې لس زره امریکایي او د امریکا د ائتلافي ځواکونو وتل پیل شي.
دا ټول ځواکونه به د سېپټمبر تر ۱۱مې له افغانستانه ووځي.
