د افغانستان د عامې روغتیا وزارت وایي، دغه هېواد کې له تېرو دوو اونیو راهیسې د کرونا پېښې په نسبي ډول د زیاتېدو په حال کې دي.
د دغه وزارت ویاند دستګیر نظري ازادي راډیو ته وویل، پرون جمعه (د غويي ۳مه) د ۱۷۸۱ مشکوکو پېښو له ډلې ۱۹۶ مثبتې راوتلي دي.
ښاغلي نظري وویل، د ویروس بدلون موندلې بڼه هم افغانستان کې اوس خپره شوې ده: "موږ تراوسه افغانستان کې د کرونا ویروس د بدلون موندلې بڼې دوه سوه مثبتې پېښې ثبت کړي دي، د بېلابېلو ولایتونو دا شمېرې ممکن په نسبي ډول لوړې وي، ځکه د ویروس دا ډول په وړو او خفیفو نښو کې راڅرګندیږي، یعنې یو کس نښې نښانې نه لري، خو ناروغي تیروي."
په افغانستان کې تراوسه په رسمي ډول د کرونا نژدې اته پنځوس نیم زره پېښې ثبت شوي او له دې ډلې څه باندې دوه نیم زره کسان مړه شوي دي.