طالبان وايي، تر هغو چې ټول بهرني ځواکونه له افغانستانه نه وي وتلي، هېڅ داسې کنفرانس کې ګډون نه کوي چې د افغانستان په اړه پریکړه په کې کېږي.
دا خبره د طالبانو د قطر د دفتر ویاند محمد نعیم تېره شپه په خپل یوه ټویټ کې کړې ده.
نوموړي ویلي، دوی خپل کارونه په مشورې سره کوي او د همدې مشورو په ترڅ کې چې هره پریکړه وشي، د هغې له مخې تصمیم نیسي.
دا اعلان وروسته تر دې کېږي چې لویدیځو رسنیو وویل، امریکایي ولسمشر جوبایډن به د سپتمبر میاشتې تر ۱۱ مې خپل ټول ځواکونه له افغانستانه وباسي.
که داسې کېږي، دا به له هغه مهلته څه باندې څلور میاشتې په ځنډ د ځواکونو وتل وي چې د طالبانو او واشنګټن د دوحې هوکړه کې یې یادونه شوې ده.
طالبان دا اعلان داسې مهال کوي چې ترکیې ویلي، د همدې میلادي میاشتې په ۲۴مه د ترکیې کانفرانس پیلیږي.
