د لاسرسۍ وړ لېنکونه

تازه خبر
شنبه ۲۸ وری ۱۴۰۰ کابل ۰۶:۱۶

بریتانيا: اسټرازینیکا دې تر ۳۰ کلونو کم عمره لویانو ته نه ورکول کېږي


اسټرازینیکا واکسین

بریتانوي چارواکو سپارښتنه کړې چې د کووېډ- ۱۹ ضد اسټرازینیکا واکسین دې تر ۳۰ کلونو کم عمره لویانو ته نه ورکول کېږي، ځکه شواهدو ښودلې چې ښایي د دغه واکسین ډوز د وینې له غوټه کېدو سره تړاو ولري.

د غه سپارښتنه داسې مهال کېږي چې د اروپایي ټولنې د درملو د تنظیم ادارې وویل چې د وینې د غوټې کېدو ډېرې نادرې پېښې ښایي د اسټرازینیکا له جانبي عوارضو څخه وي خو دې ادارې بیا هم ټینګار وکړ چې د دغه واکسین ګټې د هغه له خطرونو زیاتې دي.

یو شمېر هېوادونو خپلو ځوانو وګړو ته د دغه واکسین کارول تېره میاشت د لنډې مودې لپاره وروسته له هغې وځنډول چې په یو شمېر سیمو کې د وینې د غوټه کېدو پېښې ثبت شوي.

وروسته له هغې چې د هغو ۱۹ کسانو چې د اسټرازینیکا واکسین ورته لګول شوی و، د مړینې راپورونه خپاره شول، بریتانیا وویل، نور به تر ډېره دغه واکسین له ۳۰ کلونو کم عمره لویانو ته ورنه کړي بلکه هغوی به بل بدیل واکسین ترلاسه کړي.

XS
SM
MD
LG