د جرمني د بایرن ایالت د روسیې د کرونا ضد سپوټنیک-وي د دوه نیم میلیونه ډوزه واکسین د پېرلو یو تفاهم لیک لاسلیک کړ او کله چې د اروپایي ټولنې د درملو اداره دغه واکسین تایید کړي، عملي چارې به یې پیل شي.
د دې ایالت والي، مارکوس شوېدر پرون چهارشنبې (د وري ۱۸مه) وویل، د دغه واکسین د پیرلو لپاره تفاهم لیک له هغې کمپنۍ سره لاسلیک شو چې د اروپا د درملو د ادارې تر تایید وروسته به دغه واکسین د جرمني په ایلیر ټیسین کې تولید کړي.
د بایرن د روغتیا وزیر کلاوس هولیچچیک وویل چې ښایي دې ښار کې د دغه واکسین تولید سږ کال پیل شي. نوموړی دغه واکسین ډېر مؤثر وباله.
د لاسلیک شوي تفاهم لیک له مخې دغه راز جرمني کولای شي چې د سپوټینک-وي واکسین له بهره هم وارد کړي.
د اروپا د درملو د تنظیم ادارې دغه واکسین ته د اجازې ورکولو پروسه پیل کړې او تمه ده چې د روانې میاشتې په وروستیو کې روسیې ته خپل متخصصین هم واستوي.