هنګري پرون سې شنبه (د وري ۳مه) په یوه ورځ د کووېډ-۱۹ ناروغۍ له کبله د مړینو تر ټولو لویه شمېره ثبت کړه.
له دې اعلان وروسته د هنګري صدراعظم ویکتور اوربان د دې هېواد د ځینو اقتصادي برخو د بیا فعالولو پرېکړه وځنډوله.
هنګري پرون سې شنبې په ۲۴ ساعتونو کې د ۲۵۲ کسانو مړینه اعلان کړه. دا ارقام په داسې حال کې خپرېږي چې په کووېډ- ۱۹ ناروغۍ خورا زیات اخته کسان د مصنوعي تنفس د ترلاسه کولو لپاره په روغتونونو کې بستر شوي.
په هنګري کې له نوومبر میاشتې راهیسې د ښوونځيو او وړکتونونو لپاره د نسبي قرنطین پیل اعلان شوی چې تر اوسه روان دی.
روغتیايي چارواکو د دوشنبې په ورځ خلکو ته خبرداری ورکړ چې د امکان په صورت کې په اوونۍ کې یوازې یو ځل د خرید لپاره بازار ته ولاړ شي او له هر راز غیر ضروري سفرونو دې ډډه وکړي.
هنګري د اروپايي ټولنې لومړنی هېواد دی چې د کرونا ویروس پرضد د روسیې او چین له خوا جوړ شوی واکسین یې وپېره او تطبیق یې پیل کړ.