د وروستیو څېړنو له مخې چې پایلې یې پرون چهارشنبه(د کب ۲۰مه) خپرې شوې، په بریتانیا کې د کرونا متحرک ویروس د کرونا تر مخکنیو ډولونو په سلو کې ۶۴ وژونکی دی.
د کرونا دا ډول اوس د نړۍ په ګڼو هېوادونو کې خپورشوی او له دې ویروس سره مبارزه یې سخته کړې ده.
د بریتانیا حکومت هم په جنورۍ کې د یوې جلا طبي څېړنې پر اساس ویلي و چې د پخوانیو ډولونو پرتله پردغه متحرک ډول کرونا ویروس، د مړینې خطر لږترلږه په سلو کې ۴۰ ډېر دی.
د بریتانیا د اکستر پوهنتون له لوري د وروستۍ څېړنې پایلې د چهارشنبې په ورځ د بریتانیا په طبي ژورنال یا بي اېم جي کې خپرې شوې.
څېړونکو له اکتوبر څخه تر جنورۍ پورې په کرونا د کابو ۵۵ زره اخته کسانو حالت څارلی دی.
ویل شوي چې دې کسانو چې ۲۸ ورځې څارل شوي، په بېلابېلو عمرونو او توکمونو او قومونو پورې تړاو درلود.