د افغانستان د هوا پېژندنې ملي اداره د دغه هېواد په ۲۴ ولایتونو د سختو سیلابونو او ورښتونو د راوتلو خبر ورکوي.
د دې ادارې د وړاندوینې برخې مسوول محمد نسیم مرادي ازادي راډیو سره خبرو کې وویل: "د روانې لمریزې میاشتې په ۱۶مه به کابل، غور، بادغیس، فاریاب، سرپل، دایکندی، بلخ، سمنګان، بدخشان، بامیان، میدان وردګ، بغلان، کندز، تخار، پروان، پنجشیر او سالنګونو کې د سختې واورې او بارانونو احتمال شته. د ورښتونو کچه له ۱۰ څخه تر ۳۰ ملي میتره پورې اټکل شوې."
د ښاغلي مرادي په خبره، په کونړ، ننګرهار، پکتیا، خوست، کاپیسا، نورستان، لوګر او لغمان کې هم وړاندوینې شوي.
د ده په خبره، دغه وړاندوینه د افغانستان د هوا پېژندنې ادارې د ۲۲ مرکز له خوا شوې.
دا په داسې حال کې ده چې چاوراکي د ۱۳۹۹ کال د ورښت د کچې فیصدي د تېرکال پرتله له ۳۰ څخه تر ۳۵ سلنې کمه تخمین کړې.
په همدې حال کې له طبیعي پېښو سره د افغان دولت وزارت په ۱۴۰۰ کال کې د وچکالۍ خبر ورکوي.
خو د دې وزارت د انسجام برخې مرستیال قاسم حیدري له ازادي راډیو سره به خبرو کې د دې وچکالۍ د کابو کېدو لپاره د چمتوالي خبره هم کوي: "هر بنسټ خپل چمتوالی لري، ډېرې کمېټې جوړې شوي، یوه کمېټه د افغانستان د جمهوري ریاست د لومړي معاونیت له خوا رهبري کېږي، بله کمېټه د پېښو سره د افغان دولت په وزارت کې جوړه شوې چې دا ټول د وچکالي د کابو کېدو او په دې برخه کې د ځواب ورکونې لپاره کار کوي."
ښاغلي حیدري هرات، بادغیس، غور، غزني او ځیني مرکزي او شمالي ولایتونه هغه سیمې یادوي چې د وچکالې له امله به زیان وویني.
افغانستان یو له هغه هېوادنو څخه دی چې شااوخوا ۴۵ فیصده خلک یې له کرنې سره تړلی خپل ژوند پر مخ بیايي.
د طبیعي پېښو سره د مبارزې وزارت د معلوماتو له مخې افغانستان له وچکالۍ د ژغورنې لپاره ۲۵۰ ملي متره ورښت ته اړتیا لري.