په متحده عرب اماراتو کې د افغانستان او زیمبابوې ترمنځ د کرکټ ټېسټ لوبه پیل شوه چې افغانستان په کې ۱۳۱ منډې وکړې.
اوس زمبابوې په خپله پاڼۍ کې د وروستي لوبغاړي تر سوځېدو منډې جوړوي.
د کرکټ بورډ ویاند فرید هوتک ازادي راډیو ته وویل، د کرکټ پیچ یا میدان تر ډېره د توپ اچوونکو لپاره مناسب و: "په لومړۍ ورځ ویکټې یا پیچ له توپ اچوونکو سره ډېره مرسته کوله، ځکه نو دواړه لوبډلو خپلې ویکټې په کمو منډو ژر- ژر له لاسه ورکړلې. افغانستان ۱۳۱ منډې وکړې. افغان لوبغاړو له وړاندې ښه چمتووالی نیولی او هیله من یو چې د افغانستان لپاره ښه نتیجه ولري."
د افغانستان او زیمبابوې ترمنځ به دویمه ټېسټ لوبه د مارچ پر لسمه نېټه پیل شي.
د افغانستان په کوربه توب به دواړه هېوادونه په خپلو کې درې شل اووره مسابقې هم کوي چې لومړۍ به یې د مارچ پر ۱۷مه وي.