د لاسرسۍ وړ لېنکونه

تازه خبر
پنجشنبه ۷ کب ۱۳۹۹ کابل ۰۳:۱۹

افغانستان

اشرف غني: له افغانستانه د شوروي ځواکونو وتل مسؤلانه نه‌و

د افغانستان ولسمشر محمد اشرف غني

افغان ولسمشر اشرف غني وایي له افغانستانه د شوروي ځواکونو وتل مسؤلانه نه‌و او له امله‌یې دا هېواد کورنۍ جګړې ته دننه کړای شو.

ښاغلي غني دا خبره نن له افغانستانه د شوروي ځواکونو د وتلو د ۳۲مې کلیزې په مناسبت په یوه پیغام کې کړې ده.

ښاغلی غني زیاتوي: "د دې لپاره چې د شوروي ځواکونو وتل مسؤلانه نه‌و او د هېواد د راتلونکي لپاره هېڅ تدبیر په‌کې نه‌و سنجول شوی افغانستان یوه څو بعدي کورنۍ جګړې ته دننه کړای شو چې په نتیجه کې یې د افغانستان امنیتي ځواکونه، ملي بنسټونه او زېربناوې له‌منځه یوړل شوې."

ځینو نورو چارواکو او جهادي مشرانو هم د دې ورځې په مناسبت پیغامونه خپاره کړي.

له دې ډلې د ملي مصالحې عالي شورا رئیس عبدالله عبدالله ویلي چې د سلواغې په ۲۶مه د شوروي ځواکونو په وړاندې د افغانستان د خلکو مبارزې نتیجه ورکړه او دا ځواکونه‌یې له افغانستانه وتلو ته اړ کړل.

هغه ویلي په افغانستان کې د شوروي په ۱۰ کلن حضور څه باندې یو ملیون افغانان ووژل شول او د ده په خبره د کودتا او ترهګرۍ بنسټونه‌یې کېښودل چې تر ننه د جنګ د دوام لامل شوی.

شوروي ځواکونه په ۱۳۵۸ کال کې افغانستان ته دننه او تر نږدې ۱۰ کلن حضور وروسته د ۱۳۶۷ کال د سلواغې په ۲۶مه ووتل.

د ورځې تازه خبرونه دلته ولولئ

لغمان او ننګرهار کې دوو فابریکو په کار پیل وکړ

ارشیف، عکس تزئیني بڼه لري

په لغمان ولایت کې د ایوډین لرونکي مالګې او په ننګرهار کې د پلاستیکي توکو د تولید فابریکو په کار پیل وکړ.

د افغانستان د صنعت او سوداګرۍ وزارت له لوري په خپره شوې اعلامیه کې راغلي، په لغمان کې لومړنۍ د مالګې فابریکه ده چې په یو جریب ځمکه کې د ۶۰ زره ډالرو په پانګونې سره جوړه شوې او په یوه شپه او ورځ کې د یو ټن ایوډین لرونکې مالګې د تولید وړتیا لري.

دغه فابریکه خپل خام مواد د بلخ ، فاریاب او تخار ولایتونو د مالګې کانونو څخه ترلاسه کوي.

د اعلامیې له مخې په ننګرهار ولایت کې د پلاستیکي توکو یوه فابریکه د ۵۰ زره امریکايي ډالرو په پانګونې سره جوړ شوې او تېره ورځ یې په کار پیل وکړ.

دغه فابریکه، بېلابېلي پلاستیکي توکي، ګلدانونه،پلاستیکي جګ او ګیلاسونه تولیدوي چې د اړتیا وړ اومه توکي هم د هېواد دننه موادو څخه ترلاسه کوي.

افغانستان ازبېکستان ته د وچې مېوې صادرات پيل کړل

د افغانستان وچه میوه

د افغانستان د کرنې او مالدارۍ وزارت وايي چې ازبېکستان ته یې د وچې مېوې صادرات پيل کړل.

د دغه وزارت ویاند اکبر رستمي نن پنجشنبه (د کب ۷مه) ازادي راډیو ته وویل چې د ایرا فورټ په نامه د یو کورني شرکت په همکاري دا صادارت پيل شول.

د ښاغلي رستمي په خبره تېره ورځ لومړۍ جوپه د ۶۰ زرو امریکايي ډالرو په ارزښت ۶۰ ټنه سره ممیز ازبېکستان ته صادر شول.

څو ورځې وړاندې هم افغان دولت ۱۴ ډوله وچه مېوه هم کاناډا ته صادر کړه، د افغانستان وچې مېوې نړۍ کې ښه بازار موندلای.

افغانستان په سیمه کې د وچې مېوې یو مهم تولیدونکی هېواد دی چې د کال په اوږدو کې سیمې او نړۍ ته بېلابېل زرګونه ټنه وچه مېوه صادروي.

اروپايي ټولنې او افغان حکومت پر ۳ موضع ګانو بحث وکړ

د افغانستان او اروپايي ټولنې ګډ بیرغونه

اروپايي ټولنې او د افغانستان حکومت پر بشري حقونو، ښې حکومتوالۍ او کډوالۍ د خپلو کاري ډلو درېیمه مجازي غونډه کې بحث وکړ.

په دې غونډه کې چې پرون چهارشنبه (د کب ۶مه) وشوه، په دغو درېیو برخو کې د پرمختګونو او ستونزو په اړه بحث وشو.

د دې غونډې د ګډې اعلامیې له مخې، تر ډېره د رسنیو د کار کوونکو، مدني فعالانو او د قانون د تنفیذ پر چارواکو پر هدف وژنو تمرکز وشو.

اروپايي ټولنې د افغانستان له حکومته غوښتنه کړې چې د دغو فعالانو امن خوندي کړي او هغه کسان محاکمه کړي چې په دغسې هدفي وژنو کې لاس لري.

د پښتني بانک پخوانی مشر او ۳ کار کوونکي په بند محکوم شول

ارشیف، په کابل کې د پښتني بانک یوه څانګه

د افغانستان د پښتني بانک پخوانی مشر او درې کار کوونکي په تنفیذي بند او هر یو په ۹۰۰زره امریکايي ډالرو نقدي جریمې محکوم شول.

د اداري فساد د لویو جرمونو پرضد د مبارزې عدلي او قضايي مرکز پرون چهارشنبه(د کب ۶مه) د محاکمې پر مهال د پښتني بانک پخوانی مشر حیات الله دیاني په شپږو کلونو او شپږو میاشتو تنفیذي بند محکوم کړ.

د دغه بانک درې نور کارکوونکي د تزویر، له قدرته د ناوړه استفادې او د ۹۰۰زره امریکايي ډالرو اختلاس په تور په څه باندې پنځو کلونو بند محکوم شول.

دغه څلور واړه هر یو د۹۰۰زره امریکايي ډالرو معادل نغدي جریمې په ورکړه هم محکوم شول.

محمد حنیف اتمر مسکو کې له روسي چارواکو سره پر افغان سولې غږېږي

د افغانستان د بهرنیو چارو وزیر محمد حنیف اتمر

د افغانستان د بهرنیو چارو وزیر به په مسکو کې د روسیې له عالي رتبه چارواکو سره د افغانستان پر سوله او نورو موضوعاتو خبرې وکړي.

محمد حنیف اتمر د خپل روسي سیال سرګي لاوروف په رسمي بلنه پرون چهارشنبه(د کب ۶مه) په درې ورځني سفر روسیې ته لاړ.

د بهرنیو چارو وزارت ویاند ګران هېواد ازادي راډیو ته وویل: "د دې سفر موخه د افغانستان د سولې په هکله د دوه-اړخیزو اړیکو پیاوړتیا، د سیمه ییزې او نړیوالې اجماع پیاوړتیا او د دواړو هېوادونو ترمنځ د اقتصادي، سیاسي او امنیتي همکاریو پراختیا ده."

دا سفر په داسې وخت کې کېږي چې تېره اوونۍ د افغانستان لپاره د روسیې ځانګړي استازي ضمیر کبلوف د سولې لپاره په افغانستان کې د یوه انتقالي ایتلافي حکومت د جوړېدو وړاندیز کړی و.

د افغانستان د بهرنیو چارو وزارت په یوه اعلامیه کې د دې پر وړاندې تُند غبرګون ښکاره کړ او دا وړاندیز یې له اوسنیو واقعیتونو سره په ټکر کې وباله.

دفاع وزارت د امریکا د ۶۴۰ جنګي وسایطو مرسته مهمه وبلله

د امریکا متحده ایالاتو د ملي دفاع وزارت ته ۶۴۰ جنګي وسایط وسپارل

د افغانستان دفاع وزارت، له دغه وزارت سره د امریکا د ۶۴۰ جنګي وسایطو مرسته مهمه وبلله.

د دغه وزارت ویاند روح الله احمدزي پرون چهارشنبه (د کب ۶مه) ناوخته ازادي راډیو ته وویل: "د امریکا متحدو ایالاتونو د افغانستان له ملي دفاع وزارت سره د ۶۴۰ جنګي وسایطو مرسته وکړه. موږ د دوی د دغو مرستو مننه کوو. له دغو وسایطو او تجهیزاتو به د امنیت د ښه والي او ټینګښت په برخه کې ګټه واخېستل شي."

د دفاع وزارت په حواله په دغو وسایطو کې چې پرون دفاع وزارت ته وسپارل شول، ۴۰۳ هاموې، ۴۳ رنجرونه، ۲۳ امبولانسونه او ۱۷۰ موټرسایکلونه شامل دي چې ټولو قول اردوګانو ته به ولېږل شي.

ارزګان کې د ورا یو موټر ۱۰ مسافر سیند کې د بند پاتې کېدو له امله مړه شوي

د افغانستان په عمومي نقشه کې ارزګان ولایت

په ارزګان کې د ورا یو موټر په سیند کې بند پاته شوی چې له کبله‌یې په‌کې سپاره ۱۰ تنه مړه شوي دي.

د ارزګان د والي له دفتره خپره شوې خبرپاڼه وایي، دغه موټر په ګېزاب ولسوالۍ کې تېره ورځ هغه مهال اوبو کې بند شو چې د هلمند له سينده تېرېده.

په خبرپاڼه کې راغلي، د موټر ماشین بخار کړی و او تر هغو چې خلک د مرستو لپاره ور رسېدل، په‌کې سپاره څلور ماشومان او ۶ ښځې مړه شوي ول.

تر اوسه معلومه نه‌ده چې د موټر دننه کسانو د اکسیجن د کموالي او که موټر ته د اوبو د ورننوتو له کبله ساه ورکړې ده.

موټر چلوونکی له دې پېښې ژوندی وتلی دی.

د غزني چارواکي: نامعلومو وسله‌والو د موبایلونو یو معلول انجنیر وواژه

چارواکي وايي، په غزني کې د موبایلونو یو انجنیر نامعلومو وسله‌والو په دې خاطر وژلی چې د سرتېرو موبایلونه‌یې جوړول.

د والي ویاند واحدالله جمعه‌زاده د چهارشنبې (د کب ۶مه) په ورځ ازادي راډیو ته وویل، شکرالله نن سهار د خپل کور ترڅنګ وژل شوی دی.

ښاغلی جمعه‌زاده زیاتوي: "د غزني ولایت مرکز اړوند د خشکو په سیمه کې ناپېژانده وسله‌والو یو انجنیر چې د غزني ښار په بزازي سیمه کې یې د موبایلونو دکان درلود، له دې امله په شهادت رسولی چې ګواکې ده د دولتي کسانو او امنیتي ځواکونو موبایلونه جوړول."

شکرالله په کوچنیوالي کې ګوزڼ وهلی وو چې دا وخت په پښو معلول وو.

تر اوسه د دغې پېښې مسؤلیت چا نه‌دی منلی.

دا په داسې حال کې ده چې په غزني کې د هدفي وژنو لړۍ له تېرو ۱۲ کالو څخه روانه ده.

دفاع وزارت: کندهار کې ۴۲ طالبان وژل شوي او ۸ نور ټپیان دي

ارشیف،افغان ځواکونه د عملیاتو پر مهال

د افغانستان دفاع وزارت وایي، ځواکونو یې کندهار کې ۴۲ طالبان وژلي او ۸ نور یې ټپیان کړي دي.

دغه وزارت په یوه خبرپاڼه کې ویلي چې د دولت دغه مخالفان تېره ورځ په میانشین، پنجوایي او ارغنداب ولسوالیو کې د عملیاتو پر مهال وژل شوي.

خبرپاڼه کې ویل شوي چې د عملیاتو پر مهال د ارغنداب او میوند ولسوالیو له شااوخوا سیمو څخه د طالبانو ۳۵ کړۍ ماینونه هم کشف او شنډ شوي دي.

طالبانو تر اوسه د دفاع وزارت د دغې ادعا په اړه څه نه دي ویلي.

طالبانو په یوه جلا خبرپاڼه کې د بلخ په چهاربولک او شولګر ولسوالیو کې د ۱۸ افغان سرتېرو د وژنې ادعا کړې ده.

تراوسه دولتي سرچینو په دې اړه څه نه دي ویلي.

افغان چارواکي او طالبان تل یو بل ته د دغسې درنې مرګ ژوبلې اړولو ادعا کوي، خو خپلواکې سرچینې یې ډېر کله تایید او یا هم رد نه شي کولای.

ناټو: افغانستان کې دې تاوتریخوالی ودرېږي څو سولې ته لاره هواره شي

ارشیف

ناټو یو ځل بیا وویل چې افغانستان کې باید تاوتریخوالی ودرېږي چې سولې ته لاره هواره شي.

ناټو پر خپله رسمي ټویټرپاڼه لیکلي، د ملګرو ملتونو وروستی راپور څرګندوي چې د افغانستان د دولت ضد مخالفان د ډېرې ملکي مرګ ژوبلې عاملان دي.

په افغانستان کې د ملګرو ملتونو مرستندوی ماموریت یوناما خپل کلني راپور کې وویل چې ۲۰۲۰ کال کې د ملکي مرګ ژوبلې ۶۲ سلنه عاملان وسله وال مخالفان وو.

دوی دې کال کې د ۴۵ سلنې مرګ ژوبلې نسبت طالبانو، ۸ فیصده داعش او ۹ سلنې نسبت نورو دولت ضد کړیو ته کړی دی.

د افغانستان دولت وایي، طالبان تر دې هم زیات ملامت دي، خو طالبانو بیا د ملګرو ملتونو راپور یو اړخیز بللی دی.

د پښتو ژبې نومیالی شاعر او لیکوال عبدالرحیم روغانی ومړ

ارشیف، عکس تئزيني بڼه لري

د پښتو ژبې نومیالي شاعر او لیکوال عبدالرحیم روغاني له اوږدې ناروغۍ وروسته د ۷۱ کلنۍ په عمر له نړۍ سترګې پټې کړې.

عبدالرحیم روغاني د پښتو په اوسنیو شاعرانو کې یو له هغو وو چې زیاتې قطعې یې لیکلې دي.

روغاني لومړنۍ زده کړې په خپله سیمه سوات کې کړې وې او وروسته یې په پښتو ژبه کې د ماسټرۍ تر کچې زده کړې مخته یوړې.

د روغاني په شاعري‌ کې ولسي رنګ زیات دی ځکه خو یې ډېر شعرونه مشهورو سندرغاړو هارون باچا، سردار علي ټکر او نورو له موسیقۍ سره ویلي دي.

له نوموړي ګڼ شعري او نثري اثار پاتې دي چې ( نوې نغمه، ځوریدلي احساسات، سندریز احساس، د رڼا څاڅکي) یې شعري ټولګې او ( کوربانه خیالونه او خود غرض) یې نثري کتابونه دي.

ازبېکستان کې د سیمه‌ییز اتصال په اړه نړیوال کنفرانس جوړيږي

ارشیف، تاشکند

ټاکل شوې چې په ازبېکستان کې ډېر ژر د سیمه‌ییز اتصال په اړه نړیوال کنفرانس جوړ شي.

د افغانستان د بهرنیو چارو وزارت ویاند ګران هېواد نن چهارشنبه (د کب ۶مه) ازادي راډیو ته وویل، د ازبېکستان د بهرنیو چارو وزیر عبدالعزیز کاملوف له افغان چارواکو سره د لیدنې پر مهال ویلي چې ډېر ژر به د سیمه‌ییز اتصال پر ستونزو او فرصتونو په ازبېکستان کې د سیمې د هېوادونو د ولسمشرانو او وزیرانو په کچه کنفرانس جوړ شي.

نوموړي وویل، دې کنفرانس کې ټاکل شوې چې د ازبېکستان، پاکستان او افغانستان د ولسمشرانو تر څنګ د روسیې، اروپايي ټولنې او ملګرو ملتونو استازي هم ګډون وکړي.

له دې کاره موخه دا ده چې په سېمه کې د هېوادونو ترمنځ اړیکې لا پراخې شي او اقتصادي وده رامنځ ته شي.

افغانستان د غالیو لپاره له هېواده بهر نندارتونونه جوړوي

افغاني غالۍ

د افغانستان د صنعت اوسوداګرۍ وزارت د غالیو د بازار موندنې لپاره له هېواده د باندې نندارتونونه جوړوي.

د دې وزارت ویاند فواد احمدي نن چهارشنبه(د کب ۶مه) ازادي راډیو ته وویل، دا نندارتونونه به د سیمې او نړۍ په بېلابېلو هېوادونو کې د افغاني غالیو د بازار موندنې په موخه جوړ شي.

دی زیاتوي، په سیمه او نړۍ کې د افغانستان غالۍ د مهم سوداګریز برانډ څخه شمېرل کېږي او دا وزارت هڅه کوي چې راتلونکې لمریز کال کې د غالیو په تولیداتو او صادراتو کې زیاتوالی راشي.

نوموړي همدا راز وویل چې د ملي احصايې او معلوماتو ادارې د شمېرو له مخې د روان کال په درې ربعو کې د ۱۱ میلیونه ډالرو په ارزښت ۳۵۸۱۴۹ مټره غالۍ د نړۍ بېلابېلو هېوادونو ته استول شوي دي.

د صنعت او سوداګرۍ وزارت د ښار جوړولو وزارت په همکارۍ د غالیو د صنعت د پراختیا لپاره څلور صنعتي ښارګوټي د بلخ، کابل، ننګرهار او هرات په ولایتونو کې هم جوړ کړي دي.

د افغانستان په بېلابېلو ولایتونو کې د ۱۰۰ څخه زیات ډول ډول غالۍ تولیدېږي چې دې سکټور کې د هېواد زرګونه تنه چې زیاتره يې مېرمنې دي په کار بوختې دي.

چارواکي: طالبانو د مرکزي بغلان د روغتون مسوول وژلی

وسله وال طالبان، عکس تئزیني بڼه لري

افغان چارواکي وايي، وسله والو طالبانو پرون سې شنبه (د کب ۵مه) مازیګر د مرکزي بغلان ولسوالۍ د روغتون مسوول ډاکټر خلیل الرحمن نرمګوی وژلی دی.

د کورنیو چارو وزارت ویاند طارق ارین د نرمګوی وژل کېدل تایید کړي.

هغه ویلي، د تحصیلي کړیو د وژنې دوام دا قشر له منځه نه وړي بلکې د ده په خبره زرګونه نور ډاکټران، انجینران، خبریالان او دیني عالمان ژوند او کار ته ولاړ دي.

هاخوا د افغانستان د بشري حقونو خپلواک کمېسیون مشرې شهرزاد اکبر هم د ډاکټر خلیل الرحمن نرمګوی په وژنې خواشیني ښودلې.

هغې په خپل ټوېټر لیکلي، د هدفي وژنو په لړ کې چې ټول افغانستان کې زیاتې شوي ګڼ ملکیان، فعالان او په کارپوه خلک له منځه وړل کیږي.

طالبانو په دې اړه کوم غبرګون نه دی ښودلی.

د بهرنیو چارو افغان وزیر د یو شمېر مسایلو لپاره مسکو ته ځي

ارشیف، عکس تئزیني بڼه لري

تمه ده چې د افغانستان د بهرنیو چارو وزیر نن چهارشنبه (د کب ۶مه) د سولې لپاره د سیمه ییزې اجماع د ترلاسه کولو په ګډون د یو شمېر نورو مسایلو په خاطر مسکو ته ولاړ شي.

محمد حنیف اتمر به د روسیې له بهرنیو چارو وزیر سرګي لاوروف او یو شمېر نورو چارواکو سره وګوري.

دا سفر په داسې وخت کې ترسره کېږي چې تېره اوونۍ د افغانستان لپاره د روسیې ځانګړي استازي ضمر کبلوف د سولې لپاره په افغانستان کې د یوه انتقالي ایتلافي حکومت د جوړېدو وړاندیز وکړ،

د افغانستان د بهرنیو چارو وزارت په یوه اعلامیه کې د دې پر وړاندې تُند غبرګون ښکاره کړ او دا وړاندیز یې له اوسنیو واقعیتونو سره په ټکر کې وباله.

نور راوښيه

XS
SM
MD
LG