د روغتیا نړیوال سازمان او اروپایې ټولنه د ختیځې اروپا له شپږو هېوادونو سره د مرسته په توګه د کوېډ١٩ واکسیناسیون پروګرام پیلوي.
د دې پروګرام لګښت ۴۸،۵ میلیونه ډالره یاد شوی دی.
اروپايي ټولنې او د ملګرو ملتونو د روغتیا ادارې د فبرورۍ پر ۱۱ ویلي، چې په دې پروګرام کې به ارمنستان، آذربایجان، بېلاروس، ګرجستان، مولداوي او اوکرایین شامل وي.
اروپايي کمېسیون د دې پروګرام هدف د کوواکس نړیوال نوښت له لوري د اروپا د یو څه بېوزلو هېوادونو سره مرسته بللې ده.
دا شپږ هېوادونه د ختیځي اروپا برخې دي، چې غواړي اروپايي ټولنې سره اړیکې پیاوړي کړي.
اروپايي ټولنه د واکسیناسیون دغه پروګرام لګښتونه په یوې درې کلنې دورې کې ورکوي او د روغتیا نړیوال سازمان یې په تطبیق کې مرسته کوي.