په افغانستان د ترکیې د پوهنې بنسټ ۴۰۰ افغان زده کوونکو ته د لوړو زده کړو بورسونه ورکړل.
19کلن برکت الله چې د دغې بورس له لارې ترکیې د انجنیرۍ رشته کې د زده کړو لپاره روان دی، وایي دا د افغان ځوانانو د زده کړو او تعلیم په برخه کې ګټور ګام دی.
هغه وویل: "دا به انشاءالله چې په راتلونکي کې د افغان ځوانانو لپاره ګټور تمام شي او وبه کړای شي چې په بېلابېلو برخو کې خپل هېواد ته خدمت وکړي."
برکت الله وايي، له یو لړ امتحانونو وروسته دغه بورس ته بریالی شوی.
19کلنه مرجان هم د ترکیې د پوهنې بنسټ د دغو ورکړل شویو بورسونو له زده کوونکو ده.
مرجان وایي، هیله یې دا ده چې له زده کړو وروسته بېرته هېواد ته راستنه شي هو د خپلو خکلو خدمت وکړي.
هغه زیاته کړه: "زما هیله دا ده چې په ترکیه کې له زده کړو وروسته خپل هېواد ته راستنه شم، دلته هم د دغه شان زده کړو زمینه برابره کړو او بالاخره خپل خلکو او هېواد ته د خدمت جوګه شم."
مرجان له ترکیې غواړي، چې په راتلونکي کې نورو افغان ځوانانو ته هم د لوړو زده کړو په برخه کې ورته فرصتونه برابر کړي.
په افغانستان کې د ترکیې د پوهنې بنسټ د نشراتو او عامه پوهاوي مسوول رضا پارسا ازادي راډیو ته وویل، چې د دغه بنسټ هدف دا دی چې افغان زده کوونکو ته د لوړو زده کړو زمینه برابره کړي.
پارسا زياتوي: "د ترکیې د پوهنې بنسټ یوه ژمنه دا ده چې افغان زده کوونکو لپارت د لوړو زده کړو زمینه برابره کړي، د همدې لپاره یې دغو افغان زده کوونکو ته بورسونه ورکړي او همدا یې هدف دی چې دوی په ښه کیفیت زده کړې وکړي."
ښاغلی پارسا وايي، د دغو څلور سوو بورسونو اتیا سلنه لګښت د ترکیې دولت ورکوي او پاتې نور لګښت افغانان زده کوونکي پرې کړي.
د ښاغلي پارسا په خبره، دغه ورکړل شوي بورسونه د افغان _ترک ښوونځیو زده کوونکو او نورو افغان ځوانانو ته ورکړل شوي دي.
په افغانستان کې د ترکیې د پوهنې بنسټ په خبره، یادې بورسیې په بېلابېلو رشتو لکه طب، انجنیري، کمپیوټر ساینس، نړیوالې اړیکې، حقوق، اداره او منجمنت او نورو رشتو کې ورکول شوي دي.
هڅه مو وکړه، د افغانستان د لوړو زده کړو وزارت نظر هم ولرو دا خو د دغه وزارت ویاند او نور چارواکو زموږ پوښتنو ته ځواب ونه وایه.
دا په داسې حال کې ده، چې دا مهال ګڼ شمېر نور افغان محصلین هم د ترکیې په ګډون په هند، پاکستان، امریکا، چین، روسیې او ګڼو نورو هېوادونو کې د بورسونو له لارې په لوړو زده کړو بوخت دي.
