د پاکستان صدراعظم عمران خان په افغانستان کې د تاوتریخوالي د کمښت په اهمیت ټینګار کړی څو له لارې یې اوربند ته زمینه برابره شي.
د افغانستان د سولې پروسې لپاره د پاکستان پر دوامداره ملاتړ د ټینګار په ترڅ کې د پاکستان صدراعظم عمران خان ویلي، چې په افغانستان کې د خبرو پروسه باید د هراړخیز حل لپاره له زغم او کوښښ سره تعقیب شي.
ښاغلي خان پرون د افغانستان د وحدت اسلامي ګوند له مشر محمد کریم خلیلي سره په یوه لیدنه کې دا مسئله یاده کړې ده.
د پاکستان د صدراعظم دفتر په یوه اعلامیه کې راغلي، چې عمران خان او محمد کریم خلیلي د افغانستان د سولې د پروسې او همدارنګه د افغانستان او پاکستان تر منځ د اړیکو په پراختیا باندې
بحث کړی دی.
د عمران خان په حواله په دې اعلامیه کې راغلي، چې پاکستان تل د افغانستان د لانجې په سوله ییز حل ټینګار کړی او دا یې دریځ دی چې دا لانجه په جګړو نه هوارېږي.
د ښاغلي خان په حواله په دې اعلامیه کې راغلي، چې د افغانستان د جګړې ښکېلې خواوې باید د اورکم په مسئله باندې ټينګار وکړي څو بلآخره اوربند ته زمینه برابره شي.
د پاکستان صدراعظم همداراز ویلي، چې یو باثباته او سوله ییز افغانستان به د سوداګرۍ او سیمه ایز ارتباطاتو په برخه کې د همکارۍ نوې لارې پرانیزي.
د افغانستان د اسلامي وحدت ګوند رهبر محمد کریم خلیلي دوشنبه پاکستان ته تللی دی.
د ښاغلي خلیلي په حواله د هغه په فیسبوک پاڼه په اعلامیه کې راغلي چې خلیلي د افغانستان او پاکستان د روابطو او همدارنګه د سولې د پروسې په اړه د بحث لپاره پاکستان ته تللی دی.
ښاغلي خلیلي د عمران خان تر لیدلو مخکې د پاکستان د بهرنیو چارو له وزیر شاه محمود قریشي، د پوځ له مشر جنرال قمر جاوید باجوه او د پارلمان له رییس اسد قیصر سره لیدلي دي.
د پاکستان د بهرنیو چارو وزیر د افغانستان له مذاکره کوونکو لوریو غوښتنه وکړه، چې د اورکم لپاره نهايي هڅه وکړي او د اوربند پر لوري ګامونه واخلي.
شاه محمود قریشي پرون د حزب وحدت اسلامي افغانستان له مشر محمد کریم خلیلي سره په اسلام اباد کې د کتنې پر مهال دا خبره کړه.
د پاکستان د بهرنیو چارو وزارت پرون په یوه اعلامیه کې د قریشي په وینا د افغانستان د سولې له پروسې د اسلام اباد د ملاتړ خبره تکرار کړه او ویې ویل پاکستان هیله من دی چې په قطر کې د دولت او طالبانو ترمنځ روانې مذاکرې به وکړای شي افغانستان ته تلپاتې سوله راولي.
ښاغلي خلیلي د افغانستان د سولې په پروسه کې د پاکستان د نقش مننه وکړه.
ښاغلي خلیلي د پاکستان له لوی درستیز جنرال قمر جاوید باجوه سره هم کتلي چې ویل شوي په دې کتنه کې هم د سولې پر موضوع خبرې وشوې.
تر دې مخکې د طالبانو یو هیئت چې د دوی د قطر د دفتر مشر ملا عبدالغني برادر یې مشري کوله پاکستان ته سفر کړی و او د افغانستان د سولې پر موضوع یې خبرې کړې وې.
