د افغانستان د ملي امنیت اداره وايي، په ننګرهار کې یې د داعش د هدفي وژنو د ډلې غړی او هغه زمینهساز نيولی چې غوښتل يې کابل کې د امريکا سفارت شارژدافير ترور کړي.
په ننګرهار کې د ملي امنیت د صفر دوه قطعې څانګې د سې شنبې (د مرغومي ۲۳مه) په ورځ په یوه اعلامیه کې ویلي دي چې د ننګرهار د کامې په ولسوالۍ کې یې د داعش ډلې څلور غړي نیولي چې په وینا یې يو يې 'د داعش د هدفي وژنو د ډلې غړی او زمینهساز' وو.
په اعلامیه کې همدا راز ویل شوي: "د معلوماتو له مخې د داعش ډلې هدفي وژنو غړی او زمینهساز عبد الواحد پلان درلوده چې په افغانستان کې د امریکا متحده ایالاتو سفیر او افغان لوړپوړي چارواکي په نښه او ترور کړي چې په نیول کېدو سره یې اهداف شنډ شول."
په کابل کې د امریکا سفارت په دې اړه تر اوسه څه نه دي ویلي.
د ملي امنیت اداره زیاتوي، د نوموړي د کورنۍ څخه دوه تنه نور هم د داعش ډلې د رهبرۍ غړي وو چې په وینا یې تېر کې د یوه هوایي برید په ترڅ کې وژل شوي.
ملي امنیت وايي، دا کسان تېره شپه د عملیاتو پر مهال نیول شوي دي او ورسره یو « بریټا تفنګچه، یو میل کلاشنکوف او یو چره یز هم» وو.
د افغانستان ملي امنیت په دې اړه نور معلومات نه دي ورکړي.
داعش وسله والو په دې اړه رسنیو ته څه نه دي ویلي.