په بلاروس کې د ولسمشرۍ تر ټاکنو وروسته د سیاسي اختلافاتو په دوام، د اپوزېسیون مشرې د الکساندر لوکاشینکا تازه وړاندیز رد کړ.
لوکاشینکا ژمنه کړې چې د روان میلادي کال تر پایه به د نوي اساسي قانون مسوده ترتیب او ټولپوښتنې ته بهیې وړاندې کړي.
خو د اپوزېسیون مشرې سویتلانا تیخانوفسکایا پرون په ټلګرام کې ولیکل، په بلاروس کې یوازې یو نوی اساسي قانون تصویبېدای شي چې هغه د خلکو اساسي قانون دی.
د هغې په خبره دا خلک دي چې د دې قانون مسوده به لیکي او ورباندې بحث به کوي.
د اپوزېسیون مشرې لوکاشینکا ته په اشاره ویلي، هغه سړی چې د بلاروس له وګړو بېرېږي، د هېواد له عمده قوانینو سره کوم سر و کار نهلري.
مېرمن تیخانوفسکایا ویلي، لوکاشینکا خپلې تېرایستونکې پروژې ته دوام ورکړی او هڅه کوي زیات وخت ګوتو ته ورشي، خو د هغې په ټکو نور د بلاروس وګړي ورباندې باور نهکوي.
بلاروس کې مظاهرې
وروسته له هغې چې الکساندر لوکاشینکا د اګسټ میاشتې د نهمې د ولسمشرۍ په ټاکنو کې خپله بریا اعلان کړه، په بلاروس کې له هغې راهیسې مظاهرې روانې دي. دا د هغه شپږمه دوره ده.
دغه مظاهرې د بلاروس د امنیتي ځواکونو لهخوا شدیداً ځپل شوي او پر مهالیې تر ۳۰ زرو ډېر کسان د پولیسو لهخوا توقیف شوي، ورسره پر رسنیو او عامه غونډو محدودیتونه لګول شوي دي.
د اپوزېسیون د مشرې په وینا، اپوزېسیون مخکې هم ویلي چې الکساندر لوکاشینکا د ولسمشر په توګه په رسمیت نهپېژني او د خپلې کاري دورې د دوام لپاره د هغه قانوني هڅې نهمني.
مېرمن تیخانوفسکایا ټینګار وکړ چې د ۲۰۲۱م کال تر پایه دې تازه ټاکنې او د اساسي قانون لپاره ټولپوښتنه له لوکاشینکا پرته ترسره شي.
د هغې په وینا دفتر بهیې ډېر ژر د نوي اساسي قانون مسوده د بحث لپاره وړاندې کړي.
د بلاروس د اپوزېسیون مشرې دا څرګندونې وروسته له هغې وکړې چې الکساندر لوکاشینکا د نوي اساسي قانون د مسودې د ترتیب لپاره خپله ژمنه تازه کړه.
الکساندر لوکاشینکا
د هغه دا نظریه مخکې هم د اپوزېسیون لهخوا رد شوې او د وخت ترلاسه کولو هڅه ګڼل شوې وه.
زورواکي الکساندر لوکاشینکا د ارتدوکس عیسویانو د نوي کال په مناسبت چې راروانه پنجشنبه پیلېږي، د روسیې له دولتي ټلوېزیونه په مرکه کې یو وار بیا په بلاروس کې د بدلونونو خبره وکړه، خو ویې نهویل څه ډول بدلونونه غواړي.
لوکاشینکا وویل د روان میلادي کال تر پایه به د نوي اساسي قانون مسوده ترتیب شي او بیا به د یوې ټولپوښتنې په نتیجه کې پرېکړه کېږي چې ایا بلاروس دې نوی اساسي قانون ولري که نه؟