بریتانیا وايي زیانګالو هېوادونو ته د کرونا ویروس ضد واکسین له رسولو سره د همکارۍ لپارهیې له نړیوالو مالي مرستندویانو نږدې یو میلیارد ډالره بسپنه ټوله کړې ده.
بریتانیا ویلي، د دې ترڅنګیې د یوه ځانګړي پروګرام له لارې د ۵۴۸ ملیون پاونډو مرستې ژمنه کړې ده.
دا داسې پروګرام دی چې د مرستندویانو د هرو څلورو ډالرو په وړاندې یو پاونډ ورکول کېږي.
د فرانسې خبري اژانس په حواله، کاناډا، جاپان او جرمني د هغو هېوادونو په ډله کې دي چې په ټوله کې یې د ۱،۷ میلیارد ډالرو په ټولولو کې له دې ځانګړي پروګرام سره مرسته کړې ده.
دا بسپنه به روان میلادي کال ۹۲ پرمختیايي هېوادونو ته د کرونا ضد واکسین په رسولو کې مرسته وکړي.
د امریکا د جانز هاپکنز پوهنتون د ارقامو له مخې په نړۍ کې په کرونا ویروس د اخته کسانو شمېر ۹۰ ملیونو ته رسېدلی دی.