د امریکا په متحدو ایالتونو کې د کرونا وبا خپرېدل له کنټروله وتلي چې ګڼ نور کسان په دې ویروس اخته شوي، بستر شوي او د مړینو شمېر زیات شوی دی.
په عین حال کې د کرونا ویروس ضد واکسین کمپاین چې په سستۍ پیل شوی، دوام لري.
د کرونا ویروس یا کوویډـ۱۹ناروغۍ د یوې څارونکې ادارې په حواله، په امریکا کې پرون جمعه د ریکارډ تر سطحې د کرونا ویروس زیاتې پېښې ثبت شوي چې درې لکه او لس زره وې.
په دغه هېواد کې په دې موده کې په کرونا ویروس د ۳۷۷۷ کسانو مړینه ثبت شوې چې ورسره په امریکا کې په دې ویروس د مړینو ټول شمېر درې لکه اویا زرو ته ورسېد.