په نشویل کې د کرسمس سهار خلکو په یوې ټکان ورکوونکې پېښې پيل کړ، پولیس د ښار په دویم نمبر واټ کې د یوه مشکوک ګاډي په اړه خبر شوي و.
د پېښې په سیمه کې د شااوخوا ودانیو اوسیدونکو ته له چاودنې څو دقیقې مخکې پرله پسې له سیمې د وتلو غږ کېده.
د پولیسو په هڅو سربېره د یوې ودانۍ مخته ولاړ تفریحي ګاډی چې سیاره خونه لري وچادېد.
پولیسو چاودنه قوي او ویرونکې یاده کړه.
د نشویل د ښاري پولیسو ویاند ډان ارون رسنیو ته د چاودنې په اړه وویل: "یو تفریحي موټر همدا سهار په شپږ نیمو بجو وچاودېد. موږ باور لرو چې دا یو قصدي عمل و. په دویم شمالي واټ کې تاسیاستو ته د پام وړ زیان رسیدلی دی."
پولیسو د پېښې په لومړنیو شېبو کې د لږ تر لږه درېیو کسانو د ټپي کېدو خبره تایید کړه.
دا لا نه ده معلومه چې په دننه موټر کې هم څوک و که څنګه.
د پېښې له سیمې په خپرو شوېو ویډیوګانو کې ښکاري چې له یوه موټر لمبي خیژي او شااوخوا د څو ودانیو ښېښې ماتې او سخت زیان ور رسیدلی.
د پېښې له سیمې شااوخوا لس کوره هاخوا یو پولیس د چاودنې له شدته په ځمکه لویدلی، که څه هم ډېر نه دی ژوبل خو موقتاً یې غوږونو کار پرېښی.
د نشویل ښاروال جان کوپر رسنیو ته وویل، ښه وه چې سیمه کې ډېر خلک نه وو: "موږ به پلټونکو او محکمې ته انتظار باسو. خو شکر باسو چې ډېر خلک په سیمه کې نه وو. که چېرته دا د جمعې د مازیګر پنځه بجې وای بیا به بل ډول پیغام و."
د تینسي ایالت مرکز نېشویل په تېره بیا د ښار دا سیمې چې په کې چاودنه شوې د سیلانیانو له مرکزونو ګڼل کېږي.
پېښه د کرسمس یا د عیسویانو د اختر په ورځ شوې او په ټولنیزو رسنیو باندې یې د خلکو په تېره بیا امریکایانو پراخ او تُند غبرګونونه پارولي دي.
