په کابل کې یو پخواني ښوونکي په یوه بې ساري اقدام سره د اطلاعاتو او فرهنګ وزارت په مدیریت خپل شخصي کتابتون د خلکو په واک کې ورکړ.
دغه کتابتون د اطلاعاتو او فرهنګ د پخواني وزیر سید مخدوم رهین او د شپږمې ناحیې د عامه کتابتون د مسوولینو له لوري پرانېستل شو.
د دغه کتابتون مالک امیر حمزه وايي چې په دغه کتابتون کې له دوه زره جلده زیات کتابونه شته چې د مطالعې د فرهنګ د پیاوړتیا په هدف یې په شپږمه ناحیه کې د خلکو په واک کې ورکړ.
په دې وروستیو کې کتابتون ته د مراجعینو شمېر تر سلو تنو راټیټ شوی.
دی وايي: "د کتابتون له رامنځته کېدو زما یوازنی هدف د ځوانانو مطالعه ده چې دوی د کتاب لوستلو فرهنګ هېر کړی، نو په همدې اساس مې کتابتون رامنځته کړ چې ځوانانو له کتاب لوستولو سره علاقه پیدا کړي. "
دا په داسې حال کې ده چې فرهنګپالان د ښاریانو په ځانګړي توګه د ځوانانو په کمه مطالعه انتقاد کوي.
په دغو مراسمو کې د اطلاعاتو او فرهنګ پخواني وزیر سید مخدوم رهین په افغانستان کې په کمې مطالعې د انتقاد ترڅنګ وویل، دا چاره د دې لامل شوې چې جګړه او تعصب په ټولنه کې رشد وکړي.
دی وايي: " د وروسته پاتې والي، بې فرهنګي، جهالت او ان د جګړو او تاوتریخوالي د زیاتېدو رمز یو هم همدا کتاب نه لوستل دي، کتابتونو سره مو علاقه او مینه ورکه شوې ده. "
په افغانستان کې کتاب او کتابتون ته د خلکو لاس رسی محدود دی، د مسوولینو په وینا په ټول افغانستان کې ۹۶ کتابتونونه فعالیت لري چې د کابل پنځه میلیوني ښار یوازې ۱۲ کتابتونو نه لري.
د افغانستان د اطلاعاتو او فرهنګ وزارت د عامه کتابتون رئیس حمیدالله شهراني وايي چې په عامه کتابتون کې شااوخوا څلور لکه پنځوس زره کتابونه موجود دي.
دولت د دې کتابتون د پراختیا لپاره هېڅ ځانګړې بودجه په پام کې نه ده نیولې.
د اطلاعاتو او فرهنګ وزارت دغه مسوول وايي چې له کرونا ویروس وړاندې دغه کتابتون ته په ورځ کې له درې زره زیات کسان د مطالعې لپاره راتلل، خو په دې وروستیو کې کتابتون ته د مراجعینو شمېر تر سلو تنو راټیټ شوی.