په پکتیکا کې ګڼ شمېر خلکو کابل ته د پاکستان د صدراعظم عمران خان د سفر په غبرګون لاریون وکړ.
دوی غوښتنه کوله چې د پاکستان حکومت دې د افغانستان پر وړاندې خپله پالیسي بدله کړي او د سولې، امن او ثبات لپاره له زړه ګامونه واخلي.
دوی وایي، پاکستان له افغان حکومت او خلکو سره ریښتونی نه دی او که دا هېواد په خپلو پالیسو کې بدلون را نه ولي، ورته سفرونه یې کوم درد نه شي دوا کولی.
د لاریون یو ګډونوال تاج محمد ارګونی وایي: "که دوستي کوې، نو بیا دوستي راسره وپاله کوم چې زموږ حق او حقوق دي، عمران خان څخه غوښتنه کوو چې افغانستان نور ستړی دی او دا شته پالیسي دې نوره بدله کړه."
د دې لاریون یو بل ګډونوال غلام محمد وطنمل وایي، د هېواد په یو شمېر ولایتونو کې وروستیو جګړو او افغان وژنې وښودله چې لا هم پاکستان په افغانستان کې د خپلو ګټو او اهدافو لپاره په خپلو پالیسیو کې بدلون نه دی راوستی.
دی وايي: " څو ورځې مخکې تاسې ولیدل چې وسله والو مخالفینو د هلمند او د هلمند پر یو شمېر سیمو پراخ بریدونه وکړل چې په دې بریدونو کې زیات وسله والو ته مرګ ژوبله واوښته او په دې د پاکستان د پوځ جنرالان او پوځیان هم شامل و، نو له پاکستانه غواړو چې داسې پالیسي غوره کړي چې افغانان سولې ته ورسیږي."
که څه هم پاکستان په وار-وار ویلي له افغانستان سره ښه ګاونډيتوب غواړي، خو نه یوازې عامو خلکو بلکې افغان دولت هم له دې وړاندې په ځلونو د پاکستان په حکومت ورته نیوکې کړي.
خو تازه د پنجشنبې په ورځ د پاکستان صدر اعظم عمران خان د ولسمشر اشرف غني په بلنه په یوه ورځیني سفر کابل ته راځي او نوموړی به د افغان سولې، سوداګرۍ او د سیمې د اقتصادي اړیکو پر پراختیا له افغان لوري سره خبرې وکړي.
