د بریتانیا ساسکس لوبډلې د نړۍ د شل اوره سیالیو له لومړي درجې لوبغاړي راشد خان سره د راتلونکي کال لپاره قرارداد وکړ.
افغان لوبغاړی راشد خان په ۲۰۱۸ او ۲۰۱۹ کلونو کې هم په ساسکس لوبډله کې لوبېدلی و خو سږ کال دوبی د کرونا ویروس او په نورو لیګونو کې د بوختیا له کبله له دې ټیم سره ملګری نه شو.
راشد خان حاضردمه د هند په غوره لیګ کې د حیدراباد له سن رایزر سره لوبېږي.
ده تازه په شل اوره سیالیو کې د خپلو ویکټونو شمېر تر ۳۰۰ واړاوه.
راشد خان له ساسکس سره د بېرته یوځای کېدو په اړه ویلي، خوشاله دی چې په ۲۰۲۱ کې یو وار بیا له دې ټیم سره لوبېږي.