د لاسرسۍ وړ لېنکونه

تازه خبر
پنجشنبه ۶ لیندۍ ۱۳۹۹ کابل ۱۱:۳۶

امریکا کې له ولسمشریزو انتخاباتو یوه ورځ وروسته د کرونا نوی ریکارډ


ارشیف

د امریکا متحده ایالاتو کې د ولسمشرۍ تر انتخاباتو چې تر ډېره د کرونا د خپرې شوې وبا په وړاندې د ولسمشر پر اقداماتو متمرکز و، یوه ورځ وروسته په دې هېواد کې د کرونا د ۹۹ زره او ۶۶۰ نویو مثبتو پېښو په ثتبېدو سره نوی ریکارډ ټینګ شوی.

د امریکا د جانز هاپکنز پوهنتون پرون د ورځې په لومړیو کې په وروستۍ یوه اوونۍ کې د ورځې په متوسط ډول د کرونا د ۸۶ زره او ۳۵۲ پېښو راپور ورکړی و چې هغه هم د ریکارډ تر حده لوړه شمېره ده.

د دغه ویروس له امله د مړو شمېر هم په ۱۰۰ کې ۱۵ زیات شوی، یعنې په دغه موده کې د ورځې په متوسط ډول ۸۴۶ کسان مړه شوي دي.

د ولسمشرۍ ډیموکرات کاندید جوبایډن پر خپل سیال ولسمشر ډونالد ټرمپ د کرونا د خپرې شوې وبا پر سر د راولاړ شوي بحران په خاطر سختې نیوکې کړي او له ۲۳۳ زره د زیاتو کسانو مړینه او پر دغه ویروس له نهو میلیونو د زیاتو کسانو اخته کېدل‌یې د هغه د پالېسیو زېږنده بللې ده.

خو ټرمپ دغه بحران کم اهمیته بللی او 'کووېډ-۱۹' یې له عادي زکام سره پرتله کړی.

ټرمپ دغه‌راز ټینګار کړی چې ادارې یې د دغې وبا په وړاندې سم اجراات کړي دي.

XS
SM
MD
LG