تازه: 'د طالبانو ۶ بحث پاروونکي زندانیان د نومبر په پای کې خوشې کېږي'
دوه با خبره سرچینې چې نهغواړي نومیې واخیستل شي په قطر کې د ازادي راډیو خبریال ته تأییدوي چې د طالبانو شپږ بحث پاروونکي زندانیان د نومبر میاشتې په پای کې خوشې کېږي.
خلیلزاد: اوربند قطر کې د افغانانو ترمنځ د سولې خبرو یوه مهمه موضوع ده
د افغانستان د سولې لپاره د امریکا ځانګړی استازی وايي، اوربند په قطر کې د افغانانو ترمنځ د سولې خبرو یوه مهمه موضوع ده.
زلمي خلیلزاد له ازادي راډیو سره په مرکه کې وویل، د امریکا او طالبانو په موافقه کې هم اوربند یو له څلورو مهمو موضوعاتو څخه و چې پر اساسیې د قطر موافقه لاسلیک شوه.
هغه زیاته کړه: "ګومان کوم څه چې په لنډ وخت کې عملي ښکاري هغه د جګړې د شدت کموالی دی او یا یو بشري اوربند دی، دایمي او ټولشموله اوربند فکر کوم هغه مهال ممکن دی چې پر یوه سیاسي فورمول یا حللارې موافقه یا تفاهم وشي."
خلیلزاد په عین حال کې وايي، پهکار ده چې د سیاسي موافقې لپاره لنډمهال اوربند او یا بشري اوربند وشي څو وروسته دایمي اوربند ته هم لاره پرانیستل شي.
د افغانستان حکومت د اعتماد د رامنځته کېدو لپاره له طالبانو څخه د اوربند غوښتنه کړې ده، خو تر اوسه پورې طالبانو له دې غوښتنې سره مخالفت کړی دی.
عبدالله: مذاکره کوونکي پلاوي به نن د تشدد کمولو پر پرېکړه خبرې وکړي
د افغانستان دولت پلاوی به نن (د سپټمبر۱۳مه) د طالبانو د سیاسي دفتر له استازو سره د تشدد د کمولو پر پرېکړه خبرې وکړي.
د افغانستان د ملي پخلاینې عالي شورا مشر عبدالله عبدالله ویلي چې هغوی به پرېکړه کوي چې په راروانو بحثونو کې کومو مسئلو ته لومړیتوب ورکړي.
عبدالله عبدالله پرون له روېټرز خبري اژانس سره په مرکه کې وویل: "د خلکو په ذهن کې یوه مهمه مسئله د تشدد بېخي کمېدل دي، د بشري خواخوږۍ پر اساس اوربند دی، داسې چې موږ هیله لرو چې په دایمي اوربند بدل شي."
په دوحه کې پرون د افغانستان د سولې کنفرانس په پیل کې هم عبدالله عبدالله په خپله وینا کې هم غوښتنه وکړه چې د بشري خواخوږۍ پر اساس باید په افغانستان کې اوربند اعلان شي. طالبانو تر دې وړاندې د اوربند اعلان رد کړی و او دا پرېکړهیې په دوحه کې د دولت له پلاوي سره د خبرو پیل ته پرېښې وه.
د امریکا حکومت ویلي چې په دوحه کې روانې خبرې د افغانانو ترمنځ دي او هغوي یې مشران دي او هېڅ منځګړی یا سهولت جوړوونکی برخه نه پهکې اخلي، خو که چېرې هره یوه خوا له امریکا مرسته وغواړي، دوی تیار دي. په دوحه کې د سولې خبرې د واشنګټن په مرسته پيل شوې دي.
د امریکا د بهرنیو چارو وزیر مایک پومپیو پرون په دوحه کې وویل چې د افغانستان د راتلونکي سیاسي نظام ټاکنه د افغانستان د خلکو په پرېکړه پورې تړلې ده، خو ویېویل چې ډیموکراسي د واکمنۍ تر ټولو غوره بڼه ده.
دواړو خواوو پرون د راروانو بحثونو د اجنډا د ټاکلو لپاره کاري ډلې جوړې کړې دي. د دایمي اوربند اعلان، د ښځو او لږکیو حقونه، د طالبانو د زرګونه وسلهوالو بېوسلې کېدل او د هغو غیر قانوني وسلهوالو برخلیک چې ځینې یې له حکومت سره یوځای شوي د دې خبرو سخت ټکي بلل کېږي.
عبدالله عبدالله پرون له روېټرز خبري اژانس سره په مرکه کې وویل چې د افغانستان د دولت پلاوی به د ښځو پر مدني حقونو ټینګ ولاړ وي. د افغانستان د بهرنیو چارو وزارت سرپرست، محمد حنیف اتمر پرون په دوحه کې د ازادي راډیو خبریال ته وویل چې دواړه خواوې پر یو لړ تخنیکي مسئلو موافقې ته رسېدلي دي.
امریکا او طالبانو د روان کال د فبرورۍ په میاشت کې د سولې موافقه وکړه.
قطر کې د افغان حکومت او طالبانو ترمنځ مذاکرات
په قطر کې د افغان سولې مقدماتي غونډه تاریخي پېښه وبلل شوه
د افغانستان حکومت او طالبانو ترمنځ خبرې باید د مارچ په میاشت کې لا پيل شوې وی، خو تر ډېر انتظار وروسته، بالاخره پرون د افغانستان د سولې کنفراس پيل شو.
د کنفرانس د پيل په وینا کې عبدالله عبدالله وویل: "زه په ډاډ ویلئ شم چې دا ورځ به زموږ په هېواد کې د جګړې او زموږ د خلکو د کړاو د پای ته رسېدو د ورځې په توګه ثبت شي."