دغه راپور کې چې د افغانستان روڼتیا څار بنسټ د کرکټ په چارو کې په یو پوه مشتاق رحیم لیکلی، راغلي چې افغان کرکټ بورډ له جدي مديريتي ستونزو سره مخ دی.
د افغانستان روڼتیا څار بنسټ په دغه راپور کې ويلي چې اطلاعاتو ته نهلاسرسی او د فساد په اړه د کرکټ بورډ ګنګه پالېسي د اندېښنې وړ ده.
دغه څېړنیز راپور چې په ۳۱ پاڼو کې لیکل شوی د کرکټ بورډ ۸ برخې یې تر څېړنې لاندې نیولي.
ښاغلي رحیم د شنبې په ورځ «۱۳۹۹ کال د وږې ۱۵» په کابل کې د یوې خبري ناستې پر مهال وویل، د افغانستان په کرکټ بورډ کې اداري ستونزې شته، خو ځواب ویونکي نهلري.
ښاغلی رحیم زیاتوي: "په کرکټ بورډ کې د فساد ضد بحث دی، بیا هم موږ دې مسئلې ته وتوانېدو چې ژوره کتنه وکړو، لېکن هغه راپورونه چې موږ ته راغلي د همغه معلوماتو له مخې بیا هم د دې ادارې کړنې د پوښتنې وړ دي. د بېلګې په ډول د افغانستان د ای پي اېل په اړه هغه د فساد تورونه چې په دې برخه کې و، خو کرکټ بورډ بیا هغه رد کړل، وروسته بیا موږ ته راپور راغی چې کرکټ بورډ د افغانستان لویې څارنوالۍ ته ویلي چې په دې برخه کې پلټنه وکړي، لېکن د هغې نه وروسته څه وشول، څارنوالۍ څه وکړل، په دې اړه موږ ته هېڅ معلومات نهدي راکړل شوي."
ښاغلی رحیم وايي، د نورو ستونزو ترڅنګ له تېرو شپږو کلونو راپه دېخوا د هېواد په ګوټ ګوټ کې د معیاري لوبغالو د جوړېدو خبره کېږي، خو تر اوسه ورته بنسټیز کار نهدی شوی.
په دغه څېړنیز راپور کې د بورډ د مشرتابه د استخدام، د فساد سره مبارزه، د معلوماتو نهشریکول، د لوبغاړو د غوراوي پالېسي، د انضباتي چارو مدیریت، د ښځو کرکټ، د کرکټ د چارو ادارې او د بورډ د غړو د کړنو په اړه څېړنه شوې ده.
د دې راپور په یوه برخه کې د کرکټ په ملي لوبډله کې د خپلوۍ پاللو ته هم اشاره شوې ده.
د دې راپور څېړونکی وايي، ۱۸ لوبغاړي د خپلوۍ پر بنسټ ملي لوبډلې او یا نورو ټیمونو ته غوره شوي دي.
د دغه څېړنیز راپور په یوه برخه کې افغان ولسمشر ته وړاندیز شوی چې د بورډ د غړو د ټاکل کېدو په برخه کې د دې بورډ کړنلاره تعدیل کړي. دغهشان وړاندیز شوی چې کرکټ بورډ دې د غړو د استخدام په اړه هغه طرزالعملونه چې په دې برخه کې موجود دي، روښانه کړي.
د روڼتیا څار بنسټ چارواکي وايي، د دې راپور برابرولو لپاره د افغانستان کرکټ بورډ ته د معلوماتو د ترلاسه کولو لپاره څو ځلې مراجعه شوې، خو دوی ته د رد ځواب ورکړل شوی.
په ورته وخت کې د افغانستان کرکټ بورډ ویاند فرید هوتک بیا د دې راپور په ځواب کې داسې وايي: "د افغانستان کرکټ بورډ د رسنیو له لارې خبر شو چې داسې یوه څېړنه شوې ده، موږ به کوشش وکړو چې دغه څېړنه ترلاسه کړو او وګورو چې دوی دغه معلومات د کومې کړنلارې له مخې ترلاسه کړي، له هغې وروسته به موږ خپل دریځ د رسنیو له لارې له هېوادوالو سره شریک کړو."
د روڼتیا څار بنسټ د معلوماتو له مخې که د افغانستان په کرکټ بورد کې روان حالت دوام پیدا کړي ستونزې به نورې لا پراخې شي.
د یادولو ده چې له دې وړاندې هم د افغانستان په کرکټ بورډ کې د فساد په اړه په ټولنیزو رسنیو کې ځیني راپورونه لاس په لاس شوي وو، خو افغان کرکټ بورډ بیا دا ټول رد کړي.
