عبدالله عبدالله: د طالبانو ټول ۴۰۰ بندیان افغانان دي او د هغوی په منځ کې هېڅ یو بهرنی وګړی نهشته.
د ۴۰۰ طالب بندیانو د خوشې کولو په اړه د یو شمېر افغانانو وېشلي نظرونه
یو شمېر ولسي وګړي د ۴۰۰ طالب بندیانو د ازادېدو په اړه بېلابېل نظرونه لري.
ځیني وايي چې د طالبانو ازادېدل به د سولې دروازه پرانیزي، خو یو شمېر نور بیا وايي چې د دوی ازادېدل له سولې سره هېڅ مرسته نهشي کولای.
دا وېشلي نظرونه په داسې حال کې مطرح کېږي چې د ۴۰۰ طالب زندانیانو د سرنوشت په اړه نن په کابل کې د مشورتې لویې دوهمه ورځ ده.
ځیني يې خوشې کول غواړي، خو ځیني نور يې غواړي چې له قانون سره سم باید مجازات شي؟
د افغان حکومت له لوري یو شمېر خوشې شوي طالب زندانیان
هغه افغانان چې له خوشې کېدو سرهيې موافق دي وايي، باید دغه طالبان د اوربند او جګړې ته د نهستنېدو په شرط ازاد شي.
دوی زیاتوي: "عصمت خالد یم، که د ۴۰۰ طالب په خوشې کېدو سم دستي وروسته بینالافغاني خبرې پیلېږي، خوشې دې شي، موږ یې هرکلی کوو، باید د اوربند په شرط ازاد شي."
"اکبر خان یم د کندز اوسېدونکی، که چېرې ۴۰۰ طالبان خوشې کېږي، باید نړیوال ضمانت ورنه واخیستل شي، نومونه او جرمونهیې افشا شي، له خوشې کېدو وروسته باید له څار لاندې وي چې بیا جګړو ته ستانه نهشي."
خو ځیني نور بیا وايي چې له دې وړاندې ۵،۱۰۰ نور طالبان خوشې شول، خو په جګړه کې هېڅ کمی رانهغی، نو د دغو خوشې کېدل هم هېڅ ګټه نهلري.
دوی زیاتوي: "احسانالله یم د پکتیا اوسېدونکی، ۵،۱۰۰ طالبان ازاد شول، خو هېڅ په جګړه کې کمی رانهغی، باید ۴۰۰ طالبان خوشې نهشي، ځکه جګړه نوره هم ورسره تودېږي."
افغان ولسمشر محمد اشرف غني د سولې مشورتي لویې جرګې ته د وینا پر مهال
ولسمشر محمد اشرف غني تېره ورځ د لویې مشورتي جرګې په پرانیستونکې وینا کې د ۴۰۰ طالب زندانیانو واک او صلاحیت دغې جرګې ته ورکړ.
د سولې مشورتي لویه جرګه په کابل کې روانه ده چې له ۳۴ ولایتونو شااوخوا ۳،۲۰۰ استازي پهکې ګډون لري او مشري یې هم د ملي مصالحې عالي شورا مشر عبدالله عبدالله کوي.
ښاغلي عبدالله تېره ورځ وویل چې د جرګې غړو ته د ۴۰۰ طالب بندیانو د خوشې کېدو په تړاو پرېکړه سخته ده، خو ډاډه ده چې دوی به داسې پرېکړه وکړي چې هېواد ته په خیر به وي.
د افغانستان عامې روغتیا وزارت: د سولې مشورتي لویې جرګې ۱۷ غړي په کرونا اخته دي
د افغانستان عامې روغتیا وزارت ویلي، د مشورتي لویې جرګې ځیني غړي پر کرونا ویروس اخته دي.
د دغه وزارت د عامه اړیکو مسؤل سعید جامي ازادي رادیو ته وویل، د یادې جرګې د ۱۷ ګډونوالو ټسټونه مثبت وو.
ښاغلي جامي د شنبې په ورځ «۱۳۹۹ کال د زمري ۱۸» ازادي راډیو ته وویل، دغه کسان له نورو جلا کړای شوي دي.
ښاغلی جامي زیاتوي: "تر اوسه مشورتي لویې جرګې ته له ولایتونو نه د راغلو او پهکې د نورو ۳،۷۰۰ ګډونوالو ټسټونه اخیستل شوي چې له دې ډلې ۱۷ ټسټونه مثبت وو او څو نورې نمونې تر ارزونو لاندې دي."
ښاغلي جامي دا ونهویل چې د کرونا ویروس څومره نمومې ارزول شوي او څومره ارزول کېږي.
د عامې روغتیا وزارت چارواکي وايي، په جرګه کې یو ګرځنده کلینیک شته او امبولانسونه او روغتونونه هم د تیاري په حال کې دي.
احمد جواد عثماني
د سولې د مشورتي لویې جرګې په لومړۍ ورځ د عامې روغتیا وزیر احمد جواد عثماني ویلي: "د کرونا ویروس له امله افغانستان مطلوب وضعیت لري، موږ هره ورځ د نزول خواته روان یو او د خدای په فضل پېښې مخ په کمېدو دي."
ښاغلي عثماني د جرګې له ګډونوالو غوښتي چې د کرونا ویروس د خپرېدو د مخنیوي لپاره، روغتیايي سپارښتنې په جدي توګه په پام کې ونیسي.
په ورته وخت کې د دغې جرګې ځیني ګډونوال د عامې روغتیا وزارت له تدابیرو راضي دي.
په یاده جرګه کې د پروان ولایت استازې روشنا خالد ازادي راډیو ته وویل: "زه له تدابیرو راضي یم، ځکه د هغو کسانو ټسټ چې مثبت و، جرګې ته ورته د ننوتلو اجازه ورنهکړل شوه او د چا چې منفي و، جرګې تهیې د ننوتلو اجازه درلوده."
د سولې مشورتي لویې جرګې ځیني غړي
خو د جرګې ځیني ګډونوال وايي، د جرګې په تالار کې روغتیايي سپارښتنو ته هېڅ پام نهکېږي.
عبدالواحد وویل: "زموږ دوستانو کرونا جدي ونهنیوله، په تالار کې یو لوېشت واټن هم نهو. اکثرو ماسک نهدرلود. ټول اوږه په اوږه ناست وو."
د جرګې په دوهمه ورځ د جرګې غړي په فرعي کمېټو کې په خپلو کارونو بوخت وو.
د سولې مشورتي لویه جرګې د جمعې په ورځ د ۴۰۰ طالب زندانیانو د خوشې کېدو په هدف، مشورتي کارونه پیل کړل.