د سولې مشورتي جرګې څخه یوه ګډونواله ایستل شوې
د سولې مشورتي جرګې لومړۍ ورځ د ځینو لانجو او فزیکي شخړو شاهده وه.
د سولې مشورتي لویې جرګې منتظمینو نن د ولسي جرګې او د سولې مشورتي جرګې غړې بلقیس روشن د اعتراض پر مهال له جرګې وایستله.
اغلې روشن د ولسمشر د خبرو پر وخت له خپل ځایه پاڅېده او په یوه ټوکَري بنر یې لیکلي و چې: "وحشي طالبانو ته باج ورکول ملي خیانت دی."
افغان ولسمشر اشرف غني بلقیس روشن ته وویل چې چاته باج نهورکوي او پرېکړه د جرګې په غړو پورې تړلې ده.
د ولسمشر غني او بلقیس روشن تر لنډو خبرو وروسته د خواله رسنیو د تصویرونو له مخې ښکاري بلقیس روشن د یوې بلې ښځې لهخوا په داسې حال کې چې شعار یې په لاس کې و او مخته روانه وه په ځمکه ووهل شوه.
په جرګه کې د بلقیس روشن وهل کېدو او له جرګې د هغې ایستلو ګڼ غبرګونونه هم پارولي دي.
د بشري حقونو په چارو کې د دولت وزیرې سیما سمر په خپله ټویټر لیکلي چې د معترض وهل ټکول ځورونه حسابېږي او ځورونه جرم دی چې باید عاملیې ځواب ورکړي.
اخوا په فېسبوک باندې یوه بله وېډیو هم خپره شوې چې د جرګې یو بل غړی او ځوان فعال غورځنګ سیال د جرګې د ترسراوي مسؤلینو له تالار وایسته.
غني: د سولې مشورتي جرګه سختې پرېکړې مخ کې لري
ولسمشر محمد اشرف غني نن د سولې مشورتي لویه جرګې په پرانیستونکې وینا کې وویل چې دا جرګه سختې پرېکړې مخ کې لري.
هغه وویل د طالبانو ۴۰۰ بندیان چې جرګه بهیې د خلاصون په اړه بحث کوي درنې دوسیې لري او دی یې د خوشې کولو صلاحیت نهلري.
افغان ولسمشر وویل یوازې دوه لارې موجودې دي.
هغه زیاته کړه: "طالبانو ژمنه کړې که دغه ۴۰۰ زندانیان خوشې شي دوی به په درې ورځو کې دولت سره مخامخ مذاکرات پيل کړي او د مذاکراتو اوله موضوع به د تلپاتې اوربند په سر موافقې ته رسېدل وي، په عین حال کې یې تهدید کړی که دا (بندیان) خوشې نهشي نهیوازې جنګ او تاوتریخوالي ته دوام ورکوي، بلکې لا یې زیاتوي."
د طالبانو د سیاسي دفتر ویاند سهیل شاهین نن ازادي راډیو ته وویل چې ۴۰۰ طالب بندیان باید د مستقیمو خبرو د ژر پیل لپاره د دې جرګې له دایرېدو پرته خوشې شوي وی.
د سولې مشورتي لویه جرګه نن د درېیو ورځو په مخ پیل شوې چې مشري یې د ملي مصالحې عالي شورا رئیس عبدالله عبدالله ته سپارل شوې ده.
ولسمشر غني د سولې مشورتي جرګې په اړه د امریکا د ملاتړ هرکلی وکړ
د افغانستان ولسمشر محمد اشرف غني د سولې مشورتي لویې جرګې له دایرېدو د امریکا د ملاتړ هرکلی وکړ.
ښاغلي غني نن د جرګې په پرانیستونکې وینا کې وویل مهمه ده امریکا هغه څه چې دوی ته ویلي و ننیې افغان ولس ته هم په ښکاره اعلان وکړ.
هغه زیاته کړه: "زه د امریکا متحده ایالاتو د لویې جرګې په هکله د نن ورځې له اعلامیې څخه هرکلی کوم چې په هغه کې د افغانستان د راتلونکي لپاره د مطلوب هدف د سولې د تأمین، اقتصادي پرمختیا او زموږ د اوسنۍ ټولنې د ارزښتونو څخه ملاتړ اعلان شوی دی."
د امریکا د بهرنیو چارو وزارت په یوه خبرپاڼه کې د جرګې رابلل ستایلي او ویلي یې دي، دوی پوهېږي چې ګډونوال بهیې د پاته طالب زندانیانو پر خوشې کېدو مصلحت وکړي.
د افغانستان د سولې لپاره د امریکا ځانګړي استازي زلمي خلیلزاد هم ویلي مشورتي لویه جرګه یو تاریخي فرصت دی چې د سولې د مخامخ خبرو په وړاندې وروستی خنډ لیرې کړي.
زلمي خلیلزاد نن سهار پر خپله ټویټرپاڼه ولیکل چې له جرګې نه یوه مثبته نتیجه ترلاسه کول د تاوتریخوالي د کمښت او د بینالافغاني خبرو د ژر تر ژره پیل په معنی ده.
رولاند کوبیا: اروپايي ټولنه د سولې مشورتي لویې جرګې ملاتړ کوي
د افغانستان لپاره د اروپايي ټولنې ځانګړي استازي رولاند کوبیا پر خپل ټویټر لیکلي "اروپايي ټولنې د افغانستان د سولې پروسې په اړه بحثونه دود کړي او د سولې مشورتي لویې جرګې ملاتړ کوي. مشورتي لویه جرګه د افغانانو په مشرۍ د سولې بهیر کې د پرېکړې کولو د خپلواکۍ ښکارندويي کوي. موږ هیله لرو د ملي ګټو او سولې د دفاع په لاره کې ګټور بحثونه وشي."