د ننګرهار پر محبس د وسلهوالو په ډلهییز برید کې لږترلږه ۵ کسان وژل شوي او ۴۲ نور ټپیان دي.
دا خبره نن سهار د ننګرهار د عامې روغتیا ریاست ویاند ظاهر عادل ازادي راډیو ته وکړه.
عادل وایي، دغه شمېر وژل شوي او ټپیان چې روغتون ته وروړل شوي، ټول ملکي وګړي دي.
د چارواکو په خبره برید تېر ماښام شپږ نیمې بجې محبس ته څېرمه د موټر بم په چاودنه پیل شو او ورپسې د نورو وسلهوالو بریدګرو او افغان پوځیانو جګړه ونښته.
د برید د شنډولو عملیات لا روان دي او سیمه کې لا هم د وړو وسلو ډزې اورېدل کېږي.
داعش وسلهوالې ډلې د دغه برید مسؤلیت اخیستی دی.
تازه: د ننګرهار پر محبس درې برید کوونکي ووژل شول
د ننګرهار د والي ویاند عطاالله خوګیاڼی وايي په ننګرهار محبس درې بريد کوونکي وژل شوي او ژر به پاتې هم لهمنځه یوړل شي.
ښاغلی خوګیاڼی زیاتوي: "تېر ماښام د ننګرهار محبس ته څېرمه موټر بم ترورېستي بريد شوی چې له املهيې تر دا مهاله د ملکي وګړو پنځه جسدونه او ۴۲ ټپيان حوزوي روغتون ته لېږل شوي چې د ټپيانو وضعيت د ډاډ وړ دی. امنيتي ځواکونو د محبس پوستې په بشپړ ډول تر خپل کنټرول لاندې راوستي، د لومړنيو معلوماتو له مخې تر اوسه درې بريدګر وژل شوي، خو څېرمه پلازه کې چې ملکي وګړی پهکې مېشت وو، په ډېر احتياط د پاتې وروستي منزل عمليات جريان لري، ترڅو پاتې بريدګر پهکې ووژل شي."
تازه: ننګرهار کې لا هم حمله پای ته نهده رسېدلې
د ننګرهار په مرکزي محبس برید ۱۲ ساعته وروسته لا هم پای ته نهدی رسېدلی او د ډزو غږونه اورېدل کېږي.
دغه برید چې مسؤلیتیې داعش ډلې منلی دی، تېره ورځ ماښام ۶ بجې او ۴۰ دقیقې پیل شو.
د ننګرهار د عامې روغتیا ریاست ویاند ظاهر عادل ازادي راډیو ته په یوه رالېږلي لیکلي پیغام کې وایي چې تر دې دمه ۴۲ تنه ټپیان او ۵ جسدونه د دغه ولایت سیمهییز روغتون ته وروړل شوي چې په خبرهیې ټول ملکي وګړي دي.
عادل وایي، دا وروستي ارقام نهدي او کېدای شي چې تغییر وکړي.
د یادونې وړ ده چې د پېښې په ځای کې اوس هم خال خال ډزې شته او د افغان ځواکونو تصفیوي عملیات روان دي.
د پېښې سیمه د افغان ځواکونو لهخوا کلابنده ده او هېڅچا ته په شااوخوا لارو، کوڅو او سړکونو د تګ راتګ اجازه نهورکول کېږي.
تازه: ننګرهار کې وسلهوال برید ۲ تنه وژلي او ۲۴ نور ټپيان دي
د ننګرهار د والي ویاند عطاءالله خوګیاڼی وايي: "نن ماښام شاوخوا شپږ نيمې بجې ننګرهار محبس ته څېرمه موټر بم ترورېستي بريد شوی چې له املهيې دوه ملکي وګړي شهيدان شوي او ۲۴ نور ټپيان دي. يو شمېر تښتېدلي بنديان هم بېرته نيول شوي."