د اروپايي ټولنې چارواکي، د مالي مرستو په اړه د یوه کنفرانس کوربانه وو، چې هدف یې د کرونا وبا پر وړاندې د مبارزې ملاتړ و.
د دغو چارواکو له خوا د کرونا ویروس یا کویډـ۱۹ ناروغۍ پر وړاندې د واکسین د جوړولو، دغه راز د معایناتو او درملنې لپاره د ۶ میلیارد ډالرو په اندازه د مالي مرستې ژمنه شوې ده.
د اروپايي ټولنې د کمېسیون مشرې اورزلا ون دیر لین د پرونۍ نړيوالې سرمشریزې کوربنه وه، چې د نړۍ مشرانو او د موسیقۍ د برخې ځینو پېژندل شویو څېرو په کې په انلاین ډول برخه اخیستې وه.
د اروپايي کمېسیون یوه ویاند ویلي، دوی له وړاندې د واکسین جوړولو لپاره تر پرون شنبې پورې شا و خوا ۱۰ ملیارد یورو بسپنه راټوله کړې ده.
په دغه انلاین کنفرانس کې د جرمني صدراعظمې انګېلا مېرکل، د فرانسې ولسمشر ایمانویل مکرون، نورو سیاستولو او اکاډمیکو شخصیتونو ګډون کړی و.
د امریکا د جانز هاپکینز پوهنتون د شمېرو له مخې په نړۍ کې په کرونا ویروس د اخته کسانو شمېر ۱۰ میلیونو ته نږدې شوی او څه کم ۵ لکه کسان مړه شوي دي.
له دې ناروغۍ شا و خوا ۵ ملیونه نور کسان روغ شوي هم دي.