ټاکل شوې ده چې نن د اماراتو د هوایي چلند الوتنې کابل ته شروع شي.
له څه باندې درې میاشتو راهیسې د کرونا ویروس د خپرېدو له امله افغانستان ته بهرنۍ او د افغانستان دننه الوتنې ځنډول شوې وې.
پرون لومړی بهرنی پرواز د ترکش ایرلاین و چې کابل تهیې ۳۵۰ مسافر انتقال کړل.
د داخلي الوتنو په لړ کې تمه ده چې خوست ته پروازونه پيل شي. د خوست د والي ویاند طالب منګل ازادي راډیو ته وویل: "موږ وتوانېدو چې راتلونکې اوونۍ د خوست او کابل ترمنځ پروازونه بېرته پيل کړو او ټولې هغه لارښوونې چې د کرونا ویروس د مخنیوي لپاره دي هغه په دې پروازونو کې مراعات کړو."
په لومړي ځل د خوست هوايي ډګر ته د ۲۰۱۹ کال د اکټوبر په ۱۹مه الوتنې پیل شوې چې بیا وروسته د کرونا ویروس د خپرېدو د وېرې له امله وځنډول شوې.
د خوست هوايي ډګر تر اوسه اساسي ترمینل نهلري، خو د جوړولو چارې يې روانې دي او ټاکل شوې ده چې د ترمینل له جوړېدو وروسته دې هوایي ډګر ته نړیوالې الوتنې هم پيل شي.