د هند او پاکستان ترمنځ د ترینګلتیا په دوام نوې ډېلي پرېکړه کړې چې دغلته د پاکستاني ډیپلوماتانو په شمېر کې د پام وړ کموالی راولي.
هند پرېکړه کړې چې د پاکستان سفارت نیمايي کارکوونکي له خپل هېواد وباسي او ادعا کوي چې دا کسان په هندوستان کې په جاسوسي فعالیتونو کې لاس لري او د ترهګرو سازمانونو سره اړیکې پالي.
په دې اړه د هند د بهرنیو چارو وزارت پرون (سې شنبه) ماښام یو بیان خپور کړ.
د هند د بهرنیو چارو وزارت په بیان کې ویل شوي، دا پرېکړه د یوې اوونۍ په موده کې عملي کېږې او دا پيغام په نوې ډېلي کې د پاکستان شارژدافیر ته استول شوی دی.
پاکستان او هند د اټمي وسلو لرونکي دوه ګاونډي او رقیب هېوادونه دي چې اړیکې یې ترینګلې او ډېر کله د یو بل په وړاندې ورته اقدامات کوي.
د پاکستان د بهرنیو چارو وزارت د هندوستان ادعاوې بېبنسټه بللي او د هند د بهرنیو چارو وزارت د پرېکړې په وړاندې یې په یوې اعلامیه کې ویلي په نوې ډېلي کې د پاکستان ډیپلوماتیک مأمورین تل د نړیوالو قوانینو او ډپیلوماتیکو اصولو په چوکاټ کې فعالیت کوي.
د پاکستان د بهرنیو چارو وزارت ویلي، په اسلاماباد کې یې د هندوستان شارژدافیر احضار کړی او هغه تهیې ویلي چې پاکستان هم پرېکړه کړې چې په اسلاماباد کې د هند ډیپلوماتان په ۱۰۰ کې ۵۰ کم کړي. د پاکستان د بهرنیو چارو وزارت په وینا دا هندوستان ته ورته اقدام دی.
خو د پاکستان تر دې پرېکړې مخکې هندوستان اعلان کړی و چې په اسلاماباد کې خپل کارکوونکي له خپله اړخه همدې شمېر ته راکموي.
پاکستان او هندوستان یو یې هم د یو بل په هېواد کې دایمي سفیر نهلري.
په وروستیو میاشتو کې دواړو هېوادونو یو بل د مقابل لوري د ډیپلوماتانو په غیر قانوني نیولو او له هغوی سره په نامناسب چلند تورن کړي دي.
هندوستان د مې په ۳۱مه نېټه دوه پاکستاني ډیپلوماتان وویستل او هغوی یې په جاسوسۍ تورن کړل. پاکستان دا ادعاوې رد کړې.
هندوستان تېره اوونۍ د یو پاکستاني کب نیوونکي کوتره چې له یو هېواد بل تهیې سفر کړی و او په هند کې د جاسوسۍ په شک نیول شوې وه، خوشې کړه.
هند وویل له څېړنو وروسته معلومه شوه چې دا کوتره د جاسوسۍ په چارو کې ښکېل نهوه.
