د کابل په څلورمه کارته کې د شېرشاه سوري په جامع جومات کې د جمعې د لمانځه پر مهال چاودنې د ملا امام په ګډون ځیني کسان ووژل.
د کورنیو چارو وزارت ویاند طارق ارین رسنیو ته وویل، په چاودنه کې د جومات ملا امام عزیز الله مفلح او ۳ نور کسان وژل شوي دي.
ښاغلی ارین زیاتوي: "نن ماسپښین د جمعې لمانځه پر مهال شېرشاه سوري جامع جومات کې ځای پر ځای شویو چاودېدونکو توکو چاودنه کړې چې د جومات امام او ۳ نور لمونځ کوونکي شهیدان او ۸ تنه نور ټپيان شوي دي."
ښاغلي ارین دا د افغانستان د دیني عالمانو او لمونځ کوونکو په وړاندې د اسلام د دښمنانو د جنایتونو سلسله وبلله.
طالبانو په دغې پېښه کې لاس لرل ردوي او دغه چاودنه غندي.
تر اوسه د دې پېښې مسؤلیت چا نهدی منلی.
۱۰ ورځې مخکې د جون پر دوهمه د کابل په وزیر محمد اکبر خان جامع جومات کې هم چاودنه شوې وه چې پېژندل شوی دیني عالم مولوي ایاز نیازی یې وواژه.
د هغې حملې مسؤلیت د اسلامي دولت ډلې (داعش) منلی و.
په کابل کې د امریکا سفارت د کابل پر شېرشاه سوري جامع جومات د نن ورځې چاودنه وغندله.
دغه سفارت په یوه ټویټ کې ویلي، سفارت دا حمله غندي، د قربانیانو له کورنیو سره خپله خواخوږي ښيي.