د ارمنستان صدراعظم وایي، دغه هېواد کې د 'کووېډ-۱۹' ۲۰۰ ناروغان روغتون کې بسترېدو ته اړتیا لري، خو روغتونونو کې ځای نهشته.
نیکول پاشینیان وویل، د ارمنستان د روغتیایي ساتنې سیستم دا مهال د کرونا له کبله تر سخت فشار لاندې دی.
نوموړي پرون وویل، د 'کووېډ-۱۹' یو ناروغ چې بسترکېدو ته په تمه و، په خپل کور کې یې ساه ورکړه.
تر اوسه د جنوبي قفقاز په دغه هېواد کې د کرونا څه باندې ۱۲ زره مثبتې پېښې رامنځته شوي او له دې ډلې ۱۹۰ تنه مړه شوي دي.
خو نیوکه کوونکي وایي، ارمنستان کې د کرونا د مثبتو پېښو شمېر تر هغه څه زیات دی چې رسمي اعلانیې کېږي.