په نورستان کې اوس هم یو شمېر کسان د ځنګلي ژویو او مارغانو ښکار کوي.
نورستان د هېواد په ختیځ کې هغه غرنی او ځنګل لرونکی ولایت دی چې په افغانستان کې د جنګونو له پیل کېدو وړاندې پهکې ډول ډول ځنګلي ځناور او د مارغانو بېلابېل او ښکلي نسلونه موجود و چې د زیاتو جګړو له املهيې ډېری یا ووژل شول او یا هم د انسانانو په څېر د خپلو سیمو پرېښودو ته اړ شول.
د نورستان والي حافظ عبدالقیوم د دوشنبې په ورځ ازادي راډیو ته وویل دوی د خپل کنټرول لاندې ساحو کې د مارغانو او ځنګلي ژویو په هر ډول ښکار بندیز لګولی او له ټولو خلکو غواړي چې له ښکار کولو لاس واخلي.
په نورستان کې حکومتي مسؤلین هم وايي چې په یاد ولایت کې لا هم د واورینو پړانګانو په ګډون، صحرایي غواګانې، غرڅان، غرني چرګان او نور مارغان شته چې په یو شمېر ناامنو سیمو کې يې وسلهوال کسان ښکار کوي.
د یاد ولایت د چاپېریال ساتنې رئیس د دوشنبې په ورځ ازادي رادیو ته وویل: "د چاپېریال ساتنې ملي ادارې، د امنیتي او نورو ادارو سره په ګډه کار کوي چې په ټول نورستان کې د وحشي ژویو د ښکار او وژلو مخه ونیسي، خلکو ته عامه پوهونه کړې ده چې د دغو هڅو په نتیجه کې امنیتي ساحو کې ښکار بند شوی دی او په ناامنو سیمو کې هم هڅه کېږي، هلته هم ناامنۍ ختمې شي او د انسانانو ترڅنګ پهکې د ځنګلي ژویو ژوند ته مخ ګواښونه لهمنځه لاړ شي."
په نورستان کې په داسې حال کې د وحشي ژویو ښکار دوام لري چې افغان حکومت له تېرو څو کالو په ټول افغانستان کې د دغو ژویو په ښکار بندیز اعلان کړی، خو په اکثرو ساحو کې لاهم له دغه امر سرغړونه کېږي چې ورسره په هېواد کې د ځنګلي ژویو او مارغانو نسلونه د لهمنځه تللو ګواښ سره مخ دي.
