روسیې پرون خبر ورکړ چې څه باندې ۱۰ زره کسان په دغه هېواد کې په یوه ورځ به کرونا ویروس اخته شوي.
دا په یوه ورځ په کرونا د اخته کېدونکو کسانو تر ټولو لوړ شمېر دی. هلته د ټولو مثبتو قضیو شمېر یو لک او ۳۵ زرو ته رسېږي.
پرون څلورمه پرلهپسې ورځ وه چې په روسیه کې زیات کسان په کرونا ویروس اخته شول. په روسیه کې د کرونا ویروس له لاسه د کمو مړو راپورونه خپاره شوي.
په دغه هېواد انتقاد کېږي چې ممکن د شمېرو په خپراوي باندې کلکه څارنه وکړي او پرېنږدي چې واقعي شمېرې دباندې درز وکړي.
هلته د ټولټال مړو شویو خلکو شمېر ۱۲۸۰ تنه ښودل شوی.
۱۵ زره کسان په دغه هېواد کې بېرته روغ شوي هم دي. د روسیې صدراعظم میخاییل میشوستین هم په کرونا ویروس اخته شوی دی.
د روسیې ولسمشر ولادیمیر پوتین د خپل هېواد وضعه ډېره ستونزمنه وبلله.