په سوریه کې د وسلو په یوه ډيپو کې په چاودنه کې ۱۰ ملکیان ټپیان شوي دي.
د سوریې دفاع وزارت وايي چې دا چاودنه د بشري تېروتنې له کبله شوې ده.
يو ځايي ډاکتر وايي، د وسلو د دې ډيپو دباندې دغه ۱۰ ملکیان ټپيان شوي دي.
بریتانیا مېشته د سوریې د جګړې څار اداره وايي،حُمص ښار ته نږدې د وسلو په ډيپو کې چاودنه د اسرائیل د مشکوکې راکټي حملې په نتيجه کې شوې او د لبنان حزبالله ډله له دې ځایه استفاده کوي.
دا ډله د ایران ملاتړ لري.
د حزبالله جنګیالي د سوریې په نهه کلنه جګړه کې د دې هیواد د حکومت ترڅنګ جنګېږي.
د اسرائیل پوځ چې په دې اړه له څه ویلو ډډه کړې ده، خو مخکې له دې یې په سوریه کې د ایراني ځواکونو او ایران ملاتړ لرونکو ډلو مرکزونه په نښه کړي دي.
اسرائيل وايي، د خپل هېواد په پولو کې د ایران نفوذ ورته د منلو وړ نهدی.
په دې وروستیو کې اسرائيل د سوريې په خاوره کې یو شمېر حملې کړې دي.
په همدې حال کې روېټرز خبري اژانس د یوه روسۍ سرچینې له قوله ویلي چې د اسرائيل هليکوپټرو د مهماتو پر مرکزونو حملې کړې دي.
تر دې مخکې د پنجشنبې په ورځ هم رسنیو د سوریې په قنیطره ولایت کې د لبنان د حزبالله ډلې سره پر اړوندو اهدافو د راکټي حملو خبر ورکړی وو.
په یوه بله حمله کې چې د دمشق په حومه سیمه کې وشوه، ځايي رسنیو راپور ورکړی چې ظاهراً د اسرائيل د حملو هدف د دمشق په جنوب کې دېره ایراني او متحد ځواکونهيې وو.
د سوريې د بشري حقونو اداره ادعا کوي چې په دې حمله کې څلور ایراني او درې سوري وګړي وژل شوي دي.
روېټرز وايي، د اسرائيل دا حملې په سوریه کې له ایران سره پر اړوندو نظامي ډلو د حملو بیا زیاتولو ښکارندویي کوي.
د اسرائيل د موقت دولت په چارو کې د دولت وزیر نفتالي بنیت د چهارشنبې په ورځ اعلان وکړ چې هېواد یې په سوريه کې د ایران د ځواکونو پر وړاندې غوڅ دریځ غوره کړی دی.
په سوریه کې د اسرائيل حملې وروسته له هغه ودرېدې چې د کرونا ویروس د خپرېدو اندېښنې زیاتې شوې، خو که پرونۍ حمله تأييد شي، د جمعې د ورځې حمله به په تېرو ۱۵ ورځو کې شپږمه حمله وي.
په تر ټولو مهمو حملو کې یوه چې سوریې ته د ایران د بهرنیو چارو وزیر محمد جواد ظریف له تګ سره پر یوه مهال وشوه، په حمص ولایت کې د اسرائيل تر حملو لاندې راغله چې د سوریې د بشري حقونو د څار ادارې په وینا، په دې حمله کې د درې سوري او شپږو بهرنیو وګړو په شمول لږترلږه نهه کسان ووژل شول.
