د امریکا ولسمشر ډونالد ټرمپ د پاکستان له صدراعظم عمران خان سره د کرونا ویروس وبا پر وړاندې پر مبارزې او د سیمې پر امنیتي مسئلو غږېدلی دی.
د اپرېل پر ۲۲مه سپینې ماڼۍ او د پاکستان صدراعظم دفتر په جلا جلا بیانونو کې ویلي چې دواړو مشرانو د کرونا ویروس یا 'کووېډ–۱۹' وبا او د دې له وجې پر اقتصادي مسئلو او ننګونو ټیلیفوني خبرې وکړې.
سپینه ماڼۍ وايي، ټرمپ او خان پر دې سره موافق شول چې د وبا د اقتصادي اغېز کمولو لپاره به په همغږۍ د ویروس ضد اقداماتو لپاره ګډ کار کوي.
سپېنې ماڼۍ همداراز په خپل بیان کې ویلي چې د امریکا او پاکستان حکومتي مشرانو پر سیمهییز امنیت او دوه اړخیزو موضوعاتو هم خبرې وکړې، خو نور تفصیلیې نهدی ورکړی.
البته د پاکستان صدراعظم له دفتره په خپور شوي بیان کې زیاته شوې چې عمران خان، ډونالد ټرمپ ته ډاډ ورکړ چې اسلاماباد به د افغانستان د سولې بهیر ملاتړ ته دوام ورکوي.