د افغانستان د کورنیو چارو وزارت خبرداری ورکړی چي سر له نن څخه په کابل کې ګرځبندیز په جدي توګه پلی کېږي.
د دغه وزارت په یوې اعلامیه کې چې د چهارشنبې «۱۳۹۹ کال د غويي ۰۳» په ماښام خپره شوه راغلي چې په دې اړه په یوې بېړنۍ غونډه کې چې د یاد وزارت د امنیتي مرستیال ستر پاسوال عبدالصبور قانع په مشرۍ جوړه شوې وه، پرېکړه وشوه چې د پخواني شریک شوي نوملړ پرته د نورو پر وړاندې د ګرځبندیز مقررات جدي پلي کېږي.
دغهراز د دې پرېکړې له مخې به د کابل دروازو څارنه ډېره او هم به د کابل ښار په ټولو سیمو کې ټرانسپورتي تم ځایونه وتړل شي.
د افغانستان عامې روغتیا وزارت د معلوماتو له مخې تر پرون چهارشنبې په ټول هېواد کې د کرونا ویروس مثبتې پېښې ۱۱۷۶ تنو ته ورسېدې.
د دغه وزارت ویاند وحید مایار رسنیو ته وویل چې تر ټولو ډېرې شمېرې په پلازمېنه کابل کې ثبت شوې دي، ځکه د ده په خبره کابل ښاریان روغتیایي مسایلو ته جدي توجه نهده کړې.
تر اوسه په افغانستان کې د دې ویروس د خورېدو له کبله ۴۰ کسان مړه شوي دي.
د عامې روغتیا وزارت وایي راتلونکې دوه اوونۍ ډېرې مهمې دي او ګواښیې کړی که خلک روغتیایي سپارښتنې له پامه وغورځوي، انساني ناورین به رامنځته شي.