د افغانستان عامې روغتیا وزارت وایي په دغه هېواد کې تېر یوه شپه او ورځ ۵۶ نور کسان په کرونا ویروس اخته شوي دي.
دا خبره د یاد وزارت ویاند وحیدالله مایار رسنیو ته کړې ده.
هغه ویلي په تازه شمېرو سره چې ۳۷یې یوازې د کابل دي په افغانستان کې په کرونا ویروس د ټولو اخته خلکو شمېر ۸۴۰ ته پورته شوی دی.
د کرونا ویروس وروستیو اعلان شویو شمېرو له مخې د لوړ عمر لرونکو په پرتله ډېری ځوانان په دې ویروس اخته شوي دي.
د عامې روغتیا وزارت ویاند وحیدالله مایار نن په خبري کنفرانس کې دا هم وویل چې د کرونا ویروس له امله ۳۰ کسان مړه شوي او ۵۴ کسان له درملنې وروسته روغ او بېرته خپلو کورونو ته ستانه شوي دي.