د افغانستان د زندانونو د تنظیم اداره وایي، د ولسمشر د ځانګړي فرمان له مخې تر اوسه نږدې پنځه زره زندانیان ازاد شوي دي.
دغو زندانیانو کې ښځې هم شاملې دي او ولسمشر یې د همدې حمل میاشتې په ۷مه د کرونا ویروس د خپرېدو د مخنیوي لپاره د خوشې کېدو ځانګړی فرمان صادر کړ.
د زندانونو د تنظیم ادارې نن په یوه خبرپاڼه کې ویلي، د پاتې زندانیانو د دوسیو څېړنه ګړندۍ شوې او دې کار لپاره د څارنوالانو شمېر هم دوه برابره شوی دی.
د ولسمشر په ځانګړي فرمان کې د ۱۰ زره زندانیانو د خوشې کېدو خبره شوې چې تر ډېره ښځې، ماشومان، صعبالعلاجه ناروغان او هغه زندانیان شامل دي چې عمرونهیې له ۵۵ پورته دي.
په دې فرمان کې د کورني او بهرني امنیت په وړاندې مجرم پېژندل شوي زندانیان نهدي شامل.
د زندانیانو د تنظیم اداره وایي، تر اوسه د افغانستان یوه زندان کې هم د کرونا مثبته پېښه نهده ثبت شوې او دوی په زندانونو کې د شته کسانو خوندیتوب ته هڅې زیاتې کړي.
د کرونا ویروس د مخنیوي لپاره له زندانیانو سره د کورنیو لیده کاته هم بند شوي دي.