د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۵:۴۹

په نړۍ کې د کرونا ویروس له امله د مړو شمېر له ۳۳ زرو واوښت


ارشیف، په کرونا ویروس مړ شوی کس.
ارشیف، په کرونا ویروس مړ شوی کس.

کرونا ویروس په ټوله نړۍ کې په چټکۍ په خپرېدو دی.

د کرونا ویروس یا (کوویډ–۱۹) ناروغۍ له امله په ټوله نړۍ کې د وژل شویو خلکو شمېر له ۳۳ زرو اوښتی چې دوه پر درېیمه برخه‌یې په اروپا کې دي.

په اروپا کې چې تر ټولو زیاته قرباني یې ورکړې د اسپانیا، ایټالیا او فرانسې وضعه ښه نه‌ده.

اسپانیا چې تر ايټالیا وروسته په‌کې ډېر خلک مړه شوي پرون یکشنبه د ۸۴۰ تازه مړو خبره اعلان کړه.

د اسپانیا یوه سیمه د قرنطین پر مهال.
د اسپانیا یوه سیمه د قرنطین پر مهال.

دا په اسپانیا کې د یوې ورځې تر ټولو زیاته مړینه ده.

په دې سره په اسپانیا کې د کرونا له لاسه د مړو شویو خلکو شمېر له ۶۶۰۰ اوښتی.

د اسپانیا د روغتیا وزارت ویلي چې هلته نږدې ۷۹ زره کسان اوس په کرونا ویروس اخته شوي.

د اسپانیا صدراعظم پدرو سانچر په یوه ټلوېزیوني بیانیه کې راتلونکي ته د هیله‌مندۍ او د اوسنۍ سختې وضعې سره د مبارزې لپاره خپل خلک وهڅول.

د هیپانسې صدراعظم پیډرو سانچیر
د هیپانسې صدراعظم پیډرو سانچیر

هغه زیاته کړه: "دا ډېرې سختې ورځې دي. غمجنې ورځې، ډېرې ترخې، خو برخلیک ټاکونکې ورځې. ځکه موږ ازمايي او وزنوي مو. موږ به په راتلونکي کې د دغو سختو ورځو یاد کوو چې څنګه موږ په ګډه مقاومت وکړ او اسپانیا بریالۍ ووتله."

د اسپانیې چارواکو ویلي چې پوځیان به د مړو د انتقال لپاره مؤظف شي.

اسپانیا په ټوله نړۍ کې په کرونا د اخته خلکو په حساب تر امریکا، ایټالیا او چین وروسته څلورم او د مړو شویو خلکو له پلوه تر ایټالیا وروسته په ځای کې ده.

اخوا د اسپانیا ګاونډ ایټالیا بیا په ګرده نړۍ کې د کرونا ویروس له امله ډېر زیاته ځپل شوې او څه باندې ۱۰ زره خلک‌یې مړه شوي.

د امریکا جانز هاپکنز پوهنتون وايي چې په ټوله نړۍ کې څه باندې اووه لکه کسان په کرونا ویروس اخته شوي چې له ډلې یې د مړو شمېر ۳۳ نیم زره کسانو ته رسېږي.

امریکا تر نورو وروسته د کرونا ویروس د تشخیص بهیر پیل کړ، خو بیا هم هلته یو لک او ۳۸ زره کسان دې ویروس نیولي چې له ډلې یې نږدې دوه نیم زره تنه مړه شوي.

د امریکا ولسمشر ډونالد ټرمپ د نیویارک د سیمه‌ییزو سیاستوالو له فشارونو سره سره د نیویارک ایالت د قرنطین کولو له پرېکړې تېر شوی.

ټرمپ شنبه په یوه ټویټ کې وویل چې د قرنطین پر ځای نیویارک، نیو جرسي او کنکټیکټ ته د روغتیاپالانو د استولو امر ورکوي.

په دغو سیمو کې د کرونا ویروس ډېرې مثبتې پېښې ثبت شوي.

امریکا د کرونا ویروس سره د مبارزې لپاره دوه تریلیون یا دوه زره میلیارده ډالریزه مالي بسته اجرا کړې.

دې خوا په اسیا کې بیا له هغې ډلې ایران د کرونا ویروس له لاسه په امان نه‌دی پاتې.

په ایران کې څه باندې ۳۸ زره خلک په دې ویروس اخته شوي او د مړو شویو شمېر ۲۶۴۰ ته رسېدلی دی.

ایران کې پر کرونا ویروس اخته کس
ایران کې پر کرونا ویروس اخته کس

خو له دې ټولو سره سره د نړۍ د بېلابېلو هېوادونو چارواکو د ویروس د خپرېدو د مخنیوي لپاره سخت تدابیر وضع کړي دي. د اروپا په اکثرو هېوادونو کې قرنطین وضع شوی.

په ټوله نړۍ کې یو نیم لک کسان بېرته له دې ویروسه ښه شوي او له روغتونونو وتلي دي.

د چین په ووهان ښار کې چې د دې ویروس د خپرېدو اصلي منشا ده وضعیت او ژوند بېرته په ښه کېدو دی.

په چین کې د چارواکو په خبره شنبه‌یې یوازې ۵۴ تازه قضیې ثبت کړي هغه هم د هغو کسانو وې چې له بهره ورغلي.

خو شنونکي وايي چې د چین او ایران په څېر هېوادونه حقایق پټوي او ښايي هلته په ویروس د اخته خلکو او د مړو شمېر تر اعلان شویو شمېرو ډېر وي.

XS
SM
MD
LG