یک شنبه ، د ډېسېمبر ۸مه د روسیې او بېلاروس د ادغام د تړون شلمه کلیزه ده.
دواړو هېوادونو په ۱۹۹۹ میلادي کال کې په خپلو کې د مدغم کېدو تړون لاسلیک کړی و.
د دې تړون پر ضد پرون، شنبه سلګونه وګړي د بیلاروس په پلازمېنه، منسک کې لارو او سرکونو ته راوتلي ول اوله روسیې سره د ادغام پر ضد یې شعارونه ورکول.
ډېرو لاریون کونکو د بېلاروس د لومړی خپلواک دولت د سرو لیکو سپین بېرغونه او د اروپايي اتحادیې بیرغونه پورته کړي وو.
په منسک کې لاریون کونکي د اکټوبر پر څلورلاره را غونډ شوي وو .
هغوی ژوندی دي وي بېلاروس نارې وهلې.
یوې لاریون کونکوې چې د ازادي راډیو خبریال ته یې ځان دوناتا معرفي کړی وویل: "زما زړه ماتېږي، زما هېواد له نقشې ورکېږي، یوازې د نوم خبره نه ده، ټول هېواد له منځه ځي."
د رپوټونو پر اساس، پولیسو ته ویل شوي و چې د لاریون کونکو له نیولو ډډه وکړي.
دا په داسې حال کې ده چې د بېلاروس ولسمشر الکساندر لوکاشینکا روسیې ته تللی دی.
هغه پرون په سوچي کې له ولسمشر ولادیمیر پوتین سره پر دوه اړخیزو اړیکو خبرې وکړې.
مسکو په وروستیو کې پر منسک د ادغام د تړون د عملي کولو لپاره فشارونه ډېر کړي دي.
خو د بېلاروس ولسمشر الکساندر لوکاشینکا پرون په سوچي کې خبریالانوته وویل چې له روسیې سره په اړیکو کې د مساواتو پر اصل ولاړ پرمختګ غواړي.
لوکاشینکا وویل: "مونږ لکه څرنګه چې ځیني کسانو ویلي، د ارزانه ګاز یا تېلو پسې نه یو، مونږ تیرا یو چې یو مترمکعب ګاز په ۲۰۰ ډالرو واخلو، اساسي شرط دا دی چې باید مساوي وه اوسوو."
د روسیې ولسمشر ، ولادیمیر پوتین وویل چې دواړو خواوو خپلې څېړنې کړې او باید د ادغام د تړون پر اساس پاتې کارونه ترسره کړي.
پوتین: "زه هیله لرم چې خپلې هڅې به جاري وساتو څو زموږ خلک یووالی محسوس کړي، زما له نظره اقتصادي او ټولنیز یووالی تر هرڅه مهم دی."
بیلاروس د ارزانه تېلو او د خپل اقتصاد د چلولو لپاره له روسیې پر ۵ ملیارده ډالر کلنۍ سبسایډي متکي دی.
د بیلاروس اقتصادي سیسټم د پخواني شوروي له کلونو پاتې، زوړ او تر ډېره حده د حکومت په لاس کې دی.
دا په داسې حال کې ده چې د بېلاروس او امریکا ترمنځ روابط هم په وروستیو کې د ښه کېدو پر خوا روان دي.
دواړو هېوادونو تر یولس کلنې وقفې وروسته په سپټمبر کې اعلان وکړ چې سفیران به سره تبادله کړي.