ډاکتر ناکامورا چې په یو وسله وال برید کې سخت ټپي شوی و ساه ورکړه.
د ننګرهار ولایتي چارواکي وايي چې نن سهار په مرکز جلال اباد ښار کې د جاپانۍ خیریه موسسې PMS په رئیس ډاکتر ناکامورا نامعلومو وسله والو برید کړی چې له امله يې خپله ناکامورا د سختو ټپونو له امله ساه ورکړه.
د ننګرهار د والي ویاند عطاالله خوږیاڼي له ازادي راډیو سره په خبرو کې پېښه تایید کړه او ويې ویل چې د دې جاپانۍ موسسې مشر ډاکتر ناکامورا د سختو ټپونو له امله ساه ورکړې د ه.
وسله والو کسانو د جلال اباد ښار اړوند په لومړۍ ناحیه کې د سهار شاوخوا اته بجې د ډاکتر ناکامورا په موټر ډزې کړې دي.
ډاکتر ناکامورا په پېښه کې ټپي شوی و خو درې ساتونکي، د هغه موټر چلوونکی او یو بل ملګری یې په لومړینو لحظو کې وژل شوي دي.
ډاکتر ناکامورا له کلونو راهیسې د افغانستان په ختیځ خاصتاً ننګرهار کې د کرنې او اوبو لګولو پروژې مخته وړلې چې د ښو خدمتونو په خاطر افغان ولسمشر اشرف غني د افغانستان تابعیت هم ورکړی و.
د دې برید مسوولیت تر اوسه کومې ډلې په غاړه نه دی اخیستی.
د ناکامورا د کارونو د موثریت او د ده د وژل کېدو په اړه اکرام الله اکرام په افغانستان کې د کرنې یوه متخصص انجنیز میرویس خوگیاڼي سره مرکه کړې ده.
په پیل کې ښاغلی خوګیاڼی د ناکامورا پر فعالیتونو غږېږي.
