د لاسرسۍ وړ لېنکونه

تازه خبر
چهارشنبه ۲۰ لیندۍ ۱۳۹۸ کابل ۰۳:۱۷

نړۍ

ګرجستان کې زرګونه کسانو د حکومت پر ضد لاریون وکړ

لاریون کوونکي ادعا کوي چې اوسنی مختلط انتخاباتي سیستم د ګرجستان د واکمن ګوند په ګټه دی او باید بدلون ومومي.

زرګونه کسانو وروسته له هغه د ګرجستان په مرکز تبلیسي کې لاریون وکړ چې واکمن ګوند له مخالفتونو سره سره انتخاباتي اصلاحات رد کړل.

د سیاسي مخالفو ډلو پلویانو د دوشنبې په ورځ (نومبر ۲۵مه) د جمهوري ریاست له چوک څخه د پارلمان د ودانۍ تر مخې لاریون وکړ او د ښار لوی سړک‌یې د ټرافیکو په مخ تړلی و.

لاریون کوونکو د حکومتي مشرانو د استعفا او له وخته مخکې ټاکنو غوښتنه وکړه.

دوی ژمنه کړې چې وکیلان به پارلمان ته نه‌پرېږدي، چېرته چې نن عمومي مجلس کېږي.

د ګرجستان واکمن ګوند پرون د ۲۰۲۰ کال له پیله د انتخاباتي سیستم بدلون رد کړ.

لاریون کوونکي ادعا کوي چې اوسنی مختلط انتخاباتي سیستم د ګرجستان د واکمن ګوند په ګټه دی.

د ورځې تازه خبرونه دلته ولولئ

چک جمهوریت کې یوه بریدګر شپږ کسان په ډزو ووژل

ډزې نن سهار شا او خوا اووه بجې د روغتون په یوه انتظار خونه کې وشوې.

د چک جمهوریت د اوستراوا ښار په یوه روغتون کې یوه بریدګر شپږ کسان په ډزو وژلي او وروسته یې ځان هم وژلی دی.

د چک جمهوریت صدراعظم اندرې ببیش دولتي تلویزیون ته وویل چې دا یوه داسي غمیزه ده چې هیڅ ورباندي نه پوهيږي.

ببیش وویل چې ډزې سهار شا او خوا اووه بجې په یوه انتظار خونه کې وشوې.

پولیس وايي دوی د مشکوک کس موټر وموند او کله چې دوی نږدې ورغلل، حمله کوونکي ځان هم په ډزو وواژه. دوی وايي حمله کوونکی دوه څلوېښت کلن وو.

دا له ۲۰۱۵ میلادي کال راهیسي د چک جمهوریت تر ټولو خونړۍ حمله ګڼل کیږي. په ۲۰۱۵ میلادي کال کې یوه سړي وروسته له هغه ځان وواژه چې اته کسان یې په ډزو ووژل.

جاپان د اټومي لانجې په اړه تهران او واشنګټن سره مرسته کوي 

د جاپان صدراعظم شینزو ابې

د جاپان صدراعظم وایي، د ایران ولسمشر ته هغه هېوادته د ورتلو بلنه ورکوي څو د ایران د اټومي پروګرام پرسر د تهران او واشنګټن ترمنځ د کړکیچ له هواري سره مرسته وکړي.

د جاپان صدراعظم شینزو ابې وایي، هېواد یې د ایران د ولسمشرحسن روحانې کتنې ته تیاری نیسي ځکه غواړي چې د هغې اټومي لانجې په هوارولو کې پراخ رول ولوبوي چې د تهران او واشنګټن ترمنځ را ولاړه شوې ده.

ابې چې په توکیو کې په یوه خبري کنفرانس کې خبرې کولې دغه راز وویل چې دا هیواد همداشان غواړي چې په منځني ختیځ کې د کړکیچ له کمولو سره مرسته وکړي.

هغه زیاتوي: "له جاپانه د ایران د ولسمشر حسن روحاني پرکتنې خبرې روانې دي، نړیواله ټولنه له جاپانه چې له متحدو ایالتونو سره شراکت لري او په عین حال کې هم له ایران سره له اوږدې مودې راهیسې ښه اړیکی لري، تمه کوي چې وضعیت ته رسیدګي وکړي."

د اسوشیتید پرس خبري آژانس د راپور له مخې جاپان چې د تېلو په برخه کې په سلو کې اتیا د ایران په تېلو متکي دي، د دې هېواد صدراعظم په تېر جون میاشت کې هم ایران ته تللی و چې ایران او متحده ایالات دواړه دې ته وهڅوي چې د کړکېچ د کمولو لپاره په خپلو کې خبرې وکړې خو دغو هڅو یې نتیجه ور نه کړه.

د جاپان صدراعظم شینزو ابې که څه هم جاپان ته د ولسمشر روحاني د ورتلو په اړه نور جزیات ورنکړل خو د دې هېواد رسنیو ویلي چې دغه سفرد روانې میاشتې په وروستیو کې تنظیم شوی.

له مالېزیا څخه د روحاني د پلان شوې کتنې مخکې یا وروسته.

ټاکل شوې چې حسن روحاني د اسلامي هیوادونو د کنفرانس په سرمشریزه کې چې مالیزیا به یې کوربنه وي، ګډون وکړي.

د تهران او واشنګټن ترمنځ کړکیچ وروسته له هغې زیات شو چې د امریکا ولسمشر ډونالډ ټرمپ د تیرکال په مې میاشت کې د ایران او د نړۍ د قدرتونو ترمنځ د ۲۰۱۵ میلادي کال له اټومي تړون ووت او له هغې راهیسې یې پر ایران بیرته بندیزونه ولګول.

د واشنګټن بندیزونو تر ډېره د ایران د تېلو صنعت ډیر اغېزمن کړی دی.

دغه بندیزونه ایران نه پرېږدي چې پر بهرنیانو اومه تېل وپلوري، هغه چې د دې هېواد د عوایدو اصلي سرچینه بلل کیږي.

دغو بندیزونو ته په پام تهران هم په تدریجې ډول له هغو ژمنو په شا شوی چې په شوي اټومي تړون کې یې کړي دي.

د جاپان صدراعظم زیاته کړه چې جاپان به تر خپلې وسې هڅه وکړي چې د دوامداره خبرو له لارې په منځني ختیځ کې کړکېچ کم او وضعیت ثبات ومومي.

ښاغلي ابې وویل، د دې ترڅنګ چې جاپان به دې هېواد ته د تېلو لېږدولو د کشتیو امنیت تامینوي، د انرژۍ خوندي کولو ته په پام دا د جاپان دنده ده چې په سیمه کې د سولې او ثبات په ټینګښت کې خپل رول ولوبوي.

ایران له امریکا سره د نورو بندیانو پر تبادلې چممتوالی ښودلی

ارشیف

ایران له امریکا سره د نورو بندیانو د تبادلې لپاره چمتو والی ښودلی.

د ایران د بهرنیو چارو وزیر محمد جواد ظریف د ډسمبر پر ۹ پر ټویټر پاڼه لیکلي: "روانه اونۍ د خپل برمته شوي وګړي ترلاسه کولو وروسته، د بندیانو تبادلې ته بشپړ چمتووالی لرو."

د ډسمبر پر ۷ دواړو هیوادونو یو د بل بندیان ژیو وانګ چې د امریکا د پرینستون پوهنتون فارغ التحصیل دی له ایراني ساینس پوه مسعود سلیماني سرهچې د امریکا په بند کې وو، د سویس په زوریخ ښار کې تبادله کړل.

دغه راز د ایران دولتي خبري آژانس ایرنا هم د حکومت د ویاند علي ربیعي په حواله راپور ورکړی چې وایې تهران تل له متحده ایالاتو سره د ټولو بندیانو د تبادلې لېواله دی.

واشنګټن له تهران څخه د ټولو هغو امریکاییانو د خوشې کېدو غوښتنه کړې چې د ایران په بند کې دي.

د ایران حکومت هم په اکتوبر کې امریکا ته د شلو ایرانیانو لست سپارلی وو چې د متحده ایالاتو سره د اقتصادي بندیزونو د سرغړاوي په تور بندیان دي.

شونې ده چې سانامارین د فنلنډ صدراعظمه شي

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

۳۴ کلنه سانامارین به نن په قوي احتمال د فنلنډ د صدراعظمې په توګه د دې هېواد د چارو مسولیت واخلي او د نړۍ تر ټولو ځوانه مشره به شي .

مارین د ترانسپورټ پخوانۍ وزیره او د فنلنډ د سوسیال دموکرات ګوند له لوړ پوړو چارواکو ده.

نوموړې د یکشنبې په ورځ د فنلنډ د صدراعظمۍ مقام خپل کړ.

په یوه غیر معمول بدلون سره به مارین له څلورو نورو هغو ګوندونو سره د ائتلافي حکومت مشري وکړي چې د ټولو مشرانې ښځي دي.

له هغوی څخه درې تنې شاوخوا دیرش کلنې دي.

روسیه: په نړیوال لوبو کې پر روسي ورزشکارانو بندیز ناسم او نامعقول دی

ارشیف

د روسیې د المپیک کمیټې د المپیک په نړیوالو لوبو کې پر روسي ورزشکارانو بندیز ناسم او غیر معقول اقدام ګڼلې دی.

د دې کمیټې مشر ستانیسلاف پوزد نیایکوف د دوشنبه په ورځ په مسکو کې یوې خبري غونډي ته وویل روسي ورزشکاران به د توکیو په اولمپیک کې ګډون وکړي.

هغه زیاتوي: "مونږ ډاډه یو چې د روسیې ورزشکاران به د هغې ډلې د یوې برخې په توګه چې د روسیې د اولمپیک کمیټه یې جوړوي، د توکیو المپیک لوبو ته ولاړ شي، مونږ به تر خپله وسه پورې هر هغه څه وکړو چې ډاډه شو د روسیې د المپیک ډله په جاپان کې د روسیې تر درې رنګه بیرغ لاندي سیالۍ وکړي."

نوموړي زیاته کړه چې د ډوپینګ ضد نړیوالې ادارې پریکړه د روسي لوبغاړو د برابرۍ او هم د بشري او مدني حقونو څخه سترګي پټوي.

د دوپینګ ضد نړیوالې ادارې د اجرائیوې کمیټې د ډسمبر پر نهمه د روسیې لوبغاړي او چارواکي د څلورو کلونو لپاره په المپیک لوبو او نړیوالې اتلولۍ کې له ګډونه منع کړل.

دا کمیټه وایې مسکو په هغو لابراتواري اسنادو کې مداخله کړې او جعلي اسناد یې په کې ځای پرځای کړي چې د ډوپینګ په آزموینو کې د نشه یې موادو د مثبتو پېښو په پېژندلو کې مرسته کوي.

د اسیا اتلانو لیګ د ډله ییزې پچې اچونې نېټه اعلان شوه

د اسیا فوټبال کنفدراسیون په ۲۰۲۰ میلادي کال کې د اسیا د اتلانو لیګ د ډله ییزې پچې اچونې نیټه اعلان کړه.

د اسیا اتلانو د ۲۰۲۰ لیګ پچه اچونه سبا (سه شنبه) د مالیزیا په پلازمینه کوالالامپور کې تر سره کیږي.

د د دغه سیالیو ۳۹ م پړاو دی چې د اسیایي لوبډلو ترمنځ تر سره کیږي.

بغداد کې پر پوځي اډه راکټي بریدونه شوي

د عراق د پلازمینې بغداد هوايي ډګر ته څېرمه پوځي اډه په راکټونو لګیدلې.

نن په بغداد کې په یوه پوځي اډه څو راکټونه لګیدلي دي.

د عراق د پلازمینې بغداد هوايي ډګر ته څېرمه هغه پوځي اډه په راکټونو لګیدلې چې پکې یو شمېر امریکايي پوځیان او ډپلوماټان هم مېشت دي.

د عراق پوځ په یوه بیان کې ویلي چې شپږ عراقي سرتېري په دغو راکټي بریدونو کې ټپیان دي چې له ډلې یې د دوو وضعیت ښه نه دی.

امریکايي ځواکونو ته زیان نه دی اوښتی.

ټپیان د عراق د تروریزم ضد وړې ډلګۍ غړي دي چې د امریکا له خوا جوړه او روزل شوې ده.

بیان زیاته کړې چې امنیتي ځواکونو نورې راکټ لانچرې هم پيدا کړي او دا ښيي چې د یوې لا لویې حملې پلان نیول شوی و.

دا په عراق کې په هغو پوځي اډو باندې چې په کې امریکايان دیره دي یا هم په بغداد کې د امریکا پر سفارت د بریدونو تر ټولو تازه بېلګه یادیږي.

چا سمدستي د دغو بریدونو مسوولیت په غاړه نه دی اخیستی.

د امریکا متحده ایالتونو دفاع وزارت د ایران له ملاتړ برخمنې ډلې د دغسې بریدونو په ترسره کولو تورنوي.

د شپږو اوونیو په اوږدو کې دا نهم وار دی چې په عراق کې د امریکا په مرکزونو باندې بریدونه کیږي.

امنیتي ځواکونو لږ تر لږه د یوه برید پړه د تهران له ملاتړ برخمن سختدریځي شیعه کتائب حزب الله ګروپ باندې اچوي چې د واشنګتن له خوا هم په تور لیسټ کې شامل شوی دی.

ایران په عراق کې په سختدریځو اشخاصو په تېره بیا د حشدالشعبي ملیشه ډله باندې چې دوی جوړه کړې زیات نفوذ لري.

د امریکا دفاع وزارت یوه چارواکي فرانسپرس ته ویلي چې د راکټونو وروستي برید حشدالشعبي ډله اوس د امریکا لپاره ان تر اسلامي دولت ډلې هم په یوه لوی ګواښ اړولې.

امریکا له بغداد سره ژمنه کړې چې د دې ډلې په ورکولو کې به مرسته ورسره کوي.

د جمعې په ورځ د دې ملیشه ډلې په دریو لوړپوړو مشرانو باندې د امریکا له خوا بندیزونه هم لګیدلي دي.

د عراق پوځیان یا د امریکا یا هم ایران له خوا روزل شوي او دا هېواد له دواړو سره ملګرتیا پالي.

د امریکا د سوداګریزو بندیزونو مقابلې لپاره د ایران طرحه

د ایران ولسمشر حسن روحاني

د ایران ولسمشر حسن روحاني ویلي چې د امریکا د سوداګریزو بندیزونو د مقابلې لپاره یې داسې طرحه جوړه کړې چې هېواد به یې د تیلو په عوایدو کمه اتکا وکړي.

ښاغلي روحاني پرون د دغه هېواد د پارلمان د پرانیستې په مراسمو کې وویل چې د بودیجې دا طرحه به په ایران باندې د امریکا د زیاتو فشارونو او بندیزونو په وړاندې مقاومت وکړي.

هغه وویل: "زموږ د بودیجې اساس لا هم د امریکا د حد اکثر فشار او بندیز په وړاندې دی، دا په دې معنی نه ده چې دولت دې نور ګامونه پورته نه کړي."

د امریکا ولسمشر ډونالډ ټرمپ په ۲۰۱۸ میلادي کال کې له ایران سره د نړۍ د اټومي قدرتونو له تړون ووت او په ایران یې سخت بندیزونه پیل کړل.

د بندیزونو یوه لویه برخه د ایران د تیلو په صادراتو ده.

له هماغه وخته د ایران اقتصاد مخ په ځوړ روان دی.

د لبنان پخوانی صدراعظم سعد حریري بیا صدارت ته کاندید دی

د لبنان پخوانی صدراعظم سعد حریري

د لبنان پخوانی صدراعظم سعد حریري چې شاوخوا دوه میاشتې وړاندې د لاریونونو په خاطراستعفی کړې وه یو ځل بیا ځان صدارت ته کاندید کړی دی.

حریري وروسته له هغه د کاندیدو خبر ورکړ چې صدراعظمۍ ته کاندید سني سوداګر سمیر خطیب له خپلې کاندیدۍ تېر شو.

د لبنان د سیاسي سیسټم په اساس باید د دغه هېواد صدراعظم سني مذهبی وي.

سعد حریري د اکتوبر په ۲۹ د لبنانیانو د پراخو مظاهرو پر مهال استعفی وکړه.

په لبنان کې خلکو د بې کارۍ، ناسمو خدماتو او زیات اداري فساد په خاطر مظاهرې وکړې.

عربستان په رسټورانټونو کې د ښځو او نارینه و د دروازو جلا والی لرې کړ

ارشیف

سعودي عربستان رستورانتونو کې د ښځو او نارینه و د دروازو جلا والی لرې کړ.

دا خبر پرون د سعودي عربستان د ښاري او کلیوالي چارو وزارت اعلان کړ.

په دې سره به په عامه ځایونو کې د ښځو او نارینه و تر منځ د تبعیض مسله تر یوه حده ختمیږي.

په سعودي عربستان کې هغه ښځې او نارینه چې سره خپل نه وي په عامه ځایونو لکه رسټورانټونو کې یوځای نه شي کښیناستی.

عربستان د ښځو په برخه کې ځینې قوانین اصلاح کړي او هدف یې د ریاض د ۲۰۳۰ لرلید لپاره چمتووالی دی.

هانګ کانګ کې د تېرو شپږو میاشتو اعتراضونو په دوام نن بیا لاریون شوی

د هانګ کانګ اوسېدونکو د تېرو شپږو میاشتو د اعتراضونو په دوام د مدني او بشري حقونو د دفاع لپاره نن ډلې ډلې، په هغه لاریون کې ګډون وکړ چې چارواکو یې اجازه ورکړې وه.

د ډیموکراسۍ دې پلوي معترضانو شعارونه ورکول چې له خپلو غوښتنو څخه به تېر نه شي. د لویدیځو رسنیو د راپورونو له مخې د مظاهرو اکثر ګډونوالو د سیمه ییزو او مرکزي چارواکو د احتمالي حملو له وېرې خپل مخونه په نقابونو پوښلي وو.

له دې مخکې د چارواکو له قوله په ورکړل شویو راپورونو کې راغلي وو چې یوولس کسان نیولي شوي او یوه تومانچه او ځینې نورې کوچنۍ وسلې ترې ترلاسه شوي دي.

سرګي لاوروف امریکا ته ځي

د امریکا او روسیې د بهرنیو چارو وزیران

چارواکي وايي چې د روسیې د بهرنیو چارو وزیر سرګي لاوروف به د امریکا د بهرنیو چارو له وزیر مایک پمپیو سره د لیدنې لپاره واشنګټن ته سفر وکړي.

د واشینګټن پوسټ ورځپاڼې او د اسوشیتید پریس خبري اژانس نن لوړو پوړو امریکايي چارواکو له قوله ویلي چې لاوروف به ددې اونۍ د سه شنبې په ورځ له پمپیو سره وګوري او ګومان کیږي چې دواړه به په یوه ګډه خبري غونډه کې څرګندونې هم وکړي.

د امریکايي چارواکو له قوله ویل شوي چې دواړه ډيپلوماټان به د اوکراین، سوریې ، د وسلو د کنټرول او نورو هغو مسالو په اړه خپلو کې خبرې وکړي چې د امریکا او روسیې اړیکې یې ترینګلې کړي دي.

د امریکا او روسیې د بهرنیو چارو وزیرانو پمپیو او لاروف د تېر یو کال په اوږدو کې خپلو کې څو ځلې لیدلي او همدانګه یې ټیلفوني خبرې کړي دي.

لاروف او په واشینګټن کې د روسیې پخواني سفیر سرګي کیسلیاک د 2017 م کال په مې میاشت کې له ولسمشر ډنالډ ټرمپ سره په سپینه ماڼۍ کې هم لیدلي وو.

هغه مهال پمپیو د امریکا د بهرنیو چارو د وزیر په توګه کار نه کاوه.

تر اوسه روښانه نه ده چې د روسیې د بهرنیو چارو وزیر به دا ځل د امریکا له ولسمشر ډنالډ ټرمپ سره هم وګوري او کنه.

شمالي کوریا د اوږده واټن راکټ د توغولو ازموینه کړې

ارشیف

شمالي کوریا وايي، د اوږدواټنه راکټ د توغولو له ځایه یې یوه ډېره مهمه ازموینه وکړه.

د دې ځای په اړه پخوا امریکايي چارواکو ویلي و چې له واشنګټن سره د شمالي کوریا د غیراټومي کېدو د خبرو په نتیحه کې نیمايي ویجاړ شوی دی.

شمالي کوریا دا اعلان نن (یکشنبه) یوه ورځ وروسته له دې وکړ چې د دغه هېواد یوه چارواکي وویل چې د امریکا له متحدو ایالتونو سره په خبرو کې د کوریا ټاپووزمې د غیراټومي کېدو موضوع شامله نه ده.

د جنوبي کوریا د پوځ لوی درستیز، چې د شمالي کوریا له لوري د توغندو د ازموینو څرک لګوي، د دې هېواد د تازه اعلان په اړه له څه ویلو ډډه کړې ده.

سعودي وګړي پر انټرنېټ نیوکه کړې او د اسامه نقل قول یې خپور کړی

د امریکا د فدرال پولیسو پلټونکو تراوسه پورې د دې پېښې، چې د جمعې په ورځ وشوه، د انګېزې په اړه څه نه دي ویلي.

د سختدریځو یوه څرک لګوونکې ډله وايي، د سعودي عربستان هغه پېلوټ چې د امریکا د فلوریدا د سمندري ځواک په اډه کې یې ۳ تنه ووژل، په انټرنېټ کې د امریکا پر متحدو ایالتونو انتقاد کړی و او د القاعده شبکې د وژل شوي مشر اسامه بن لادن نقل قول یې خپور کړی و.

یوه امریکايي چارواکي پرون (شنبه) اسوشیتید پریس خبري اژانس ته وویل چې دغه سعودي پېلوټ تر پېښې څو ورځې مخکې ماښامنۍ مېلمستیا کړې وه او په لړ کې یې ده او درو تنو نورو په ګډه پر خلکو د ډزو ویډیو کتلې وه.

د امریکا د فدرال پولیسو پلټونکو تراوسه پورې د دې پېښې، چې د جمعې په ورځ وشوه، د انګېزې په اړه څه نه دي ویلي.

امریکا او ایران بندیان تبادله کړي

په سویس کې د امریکا سفیر د خپل بندي ښه راغلاست ته ورغلی و.

ایران او امریکا خپلو کې د سویس په زوریخ ښار کې بندیان تبادله کړي دي.

له میاشتو ترینګلتیا وروسته دا اقدام د دواړو هیوادونو ترمنځ پرمختګ حسابیدلی شي.

د پرینتسون پوهنتون فارغ التحصیل ژیو وانګ چې ایران کې زنداني وو نن له ایراني پوه مسعود سلیماني سره مبادله شو. سلیماني د امریکا په بند کې وو.

د امریکا ولسمشر ډونالډ ټرمپ له سپېنې ماڼۍ څخه په یو بیان کې د وانګ خوشې کیدل تائید کړي او ویلي یې دي نوموړی بیرته امریکا ته ستنیږي.

تر دې مخکې د ایران د بهرنیو چارو وزیر جواد ظریف اعلان کړی و چې د بندیانو دا تبادله به زر ترسره شي.

ظریف ویلي وو، خوشاله دی چې پروفیسور مسعود سلیماني او ژیو وانګ له خپلو کورنیو سره یو ځای کیږي.

نوموړې زیاته کړې د ټولو څخه په دې پروسه کې ښکیل و په ځانګړې توګه د سویس له حکومت مننه کوي.

وروسته د ایراني خبري اژانس راپور ورکړ چې سلیماني په سویس کې ایراني چارواکو سره یو ځای شوی دی.

امریکايي وانګ په 2016 میلادي کال کې ایران کې د علمي څېړنې پر مهال ونیول شو او تورن شو چې د څیړنو په پلمه یې جاسوسي کوله، هغه څه چې د نوموړې کورنۍ او پرینتسون پوهنتون رد کړي دي.

نوموړی په لس کاله بند محکوم شوی و.

سلیماني بیا د ۲۰۱۸ میلادي کال په اکټوبر کې د بیولوژیکي موادو د صادرولو د هڅې په تور د شیکاګو په هوايي ډګر کې ونیول شو. ددې موادو صدور د هغو بندیزونو څخه سرغړاوی بلل کیږي چې امریکا پر ایران لګولي دي.

وروسته له هغې چې د تیر کال مې میاشت کې ولسمشر ټرمپ له ایران سره د 2015 میلادي کال له اتومي تړون څخه د امریکا د وتلو اعلان وکړ د دواړو هیوادونو ترمنځ ترینګلتیا زیاته شوه.

نور راوښيه

XS
SM
MD
LG